Udar pa Pałtavie, u vyniku jakoha zahinuła bolš za 50 čałaviek. Čamu adbyłasia trahiedyja?

Rankam 3 vieraśnia rasijski bok nanios udar pa Instytucie suviazi ŭ Pałtavie.

Ministestva abarony Ukrainy paviedamiła, što ŭdar byŭ naniesieny balistyčnymi rakietami typu Iskander-M.

Takaja rakieta niasie kasietnuju ci fuhasnuju bajavuju častku vahoj da 700 kh, maje dakładnaść paražeńnia ad 10 da 30 mietraŭ i zdolnaja nanieści značnyja razbureńni. U vyniku pieršaha ŭdaru byli abrušany pierakryćci pavierchaŭ budynka, druhaja ŭdaryła ŭ dach budynka źvierchu.

Prezident Ukrainy ŭ svaim telehram-kanale napisaŭ: «Papadańnie pa terytoryi navučalnaj ustanovy i susiedniaj balnicy. Byŭ častkova razburany adzin z budynkaŭ Instytuta suviazi. Ludzi apynulisia pad zavałami. Mnohich udałosia vyratavać. Bolš za 180 čałaviek paranienyja. Na žal, šmat zahinułych».

Ministr unutranych spraŭ Ukrainy Ihar Klimienka paviedamiŭ, što ŭ žyłych damach, jakija znachodziacca pobač z korpusam Instytuta suviazi, udarnaj chvalaj vybiła škło, paškodžany fasady.

Pradstaŭnik Minabarony Dźmitryj Łazutkin paviedamiŭ, što nijakich pastrajeńniaŭ ci inšych mierapryjemstvaŭ u momant udaru nie adbyvałasia. U Instytucie suviazi praciahvaŭsia navučalny praces, pakul u 09:08 nie prahučaŭ sihnał pavietranaj tryvohi — studenty nakiravalisia ŭ schovišča.

Jaho słovy paćvierdziŭ vydańniu «Suśpilnie» i adzin z vajennych, jaki na momant ataki byŭ u adnym z karpusoŭ Instytuta.

Čamu adbyłasia trahiedyja

U kamientary «Ukrainskaj praŭdzie» pres-słužba Pavietranych sił Ukrainy adznačyła: «Tryvoha była abvieščana, ale, na žal, navat dla Pałtaŭskaj vobłaści čas reahavańnia na pahrozu — vielmi karotki, litaralna ličanyja chviliny».

Pa słovach ekśpierta, dyrektara pa raźvićci infarmacyjna-kansałtynhavaj kampanii Defense Express Valeryja Rabych, Ukraina nie maje sistem dla manitorynhu zapuskaŭ balistyčnych rakiet.

Rakiety typu «Iskander» mohuć pralatać adlehłaść da 500 km, pryčym na 50 km im treba ŭsiaho 23 siekundy, a na maksimalnuju adlehłaść — 238 siekund.

Jak tłumačyć Rabych, praz adsutnaść śpiecyjalnych sistem, zdolnych adsočvać zapuski balistyčnych rakiet ź ziamli, ukrainskija sistemy mohuć vyjavić hetuju rakietu tolki tady, kali jana vyjdzie na peŭnuju trajektoryju.

Adnak na hety momant moža ŭžo prajści da 40-50% času, jaki jość na toje, kab adreahavać na sihnał pavietranaj tryvohi. Heta aznačaje, što na evakuacyju ludziej jość usiaho niekalki chvilin, što ŭskładniaje arhanizacyju maštabnych evakuacyj.

Pa stanie na ranicu 4 vieraśnia ŭ vyniku ŭdaru pa Pałtavie zahinuli 53 čałavieki, bolš za 270 paranienyja. Pad zavałami mohuć znachodzicca jašče da 5 čałaviek.

• 1
• 0
• 3
• 0
• 2
• 29
• 20
• 0