Stylovy budynak u Šabanach atrymaŭ hran-pry mižnarodnaha konkursu

Na minułym tydni ŭ Jerevanie byli vyznačany pieramožcy XXXII Mižnarodnaha ahladu-konkursu Mižnarodnaj asacyjacyi sajuzaŭ architektaraŭ (MASA).

Hran-pry i «załaty miedal» siarod realizavanych pabudoŭ byli prysudžany šmatfunkcyjanalnamu kompleksu Alutech u Minsku.

Jaho sprajektavała biełaruskaje biuro VIASET (architektary Dražyn, Hierus, Rachmańko, Nikicienka, Mićko, Piatroŭski, Piščałaŭ) u partniorstvie ź niamieckaj kampanijaj Architekten Wannenmacher + Möller GmbH (architektar Vanienmachier). 

Taksama aŭtarski kalektyŭ za hety realizavany prajekt budzie pradstaŭleny da ŭznaharodžańnia załatym miedalom Mižuradavaha savieta krain SND pa supracoŭnictvie ŭ budaŭničaj dziejnaści «Za najlepšaje architekturna-budaŭničaje rašeńnie».

Pavialičyć

Alutech — viadučy vytvorca aluminijevych profilnych sistem u SND i adzin ź lidaraŭ rynku raletnych sistem i siekcyjnych varot u Jeŭropie. Biez pradukcyi kampanii abychodzicca mała jaki pramysłovy prajekt u Biełarusi. 

Novy kompleks Alutech, płošča jakoha składaje 8500 m2, raźmiaściŭsia ŭ pramysłovaj zonie pa vulicy Sialickaha, jakaja ŭvachodzić u Svabodnuju ekanamičnuju zonu «Minsk». Jon pabudavany pa technałohii chutkaha ŭźviadzieńnia stalnych budynkaŭ ASTRON. 

Kompleks składajecca ź niekalki abjomaŭ: ekspazicyjnaha centra, ekśpierymientalna-vytvorčaj častki i administracyjnaha błoka.

Pavialičyć

Sami aŭtary nazyvajuć svoj prajekt jarkim prykładam pramysłovaj estetyki, ale ŭ rašeńni hałoŭnaha fasada ciažka ŭvohule apaznać pramysłovy budynak. Taki vyhlad chutčej charakterny dla kulturna-hramadskaha centra ŭ jakoj-niebudź zachodniejeŭrapiejskaj stalicy.

U rašeńni fasada vykarystany minimalistyčnyja srodki architekturnaj vyraznaści, charakternyja dla madernizmu. U ablicoŭcy vykarystany paneli, jakija imitujuć śvietły kamień. Fasad padzieleny na dźvie niaroŭnyja častki. Pravaja maje sucelnaje zaškleńnie, časta i naŭmysna nudna članionaje viertykalnymi rebrami, jakija ŭ pierśpiektyŭnym usprymańni, dziakujučy svajoj vialikaj hłybini, pastupova zamiaščajuć lustranuju pavierchniu škła.

Na kantraście zroblena levaja častka, dzie ŭ zahłybleńni z šyrokimi skosami, znachodzicca hałoŭny ŭvachod. Rebry, jakija vizualna padtrymlivajuć dach, raźmieščany pa łamanaj kryvoj, što stvaraje efiekt chvali. Hetyja viertykalnyja elemienty praciahvajucca ŭ adlustravańni vodnaj roŭniadzi dekaratyŭnaha basiejna. 

Alutech i sankcyi

U sakaviku hetaha hoda «Biuro» sumiesna ź niamieckim vydańniami Paper Trail Media i Manager Magazin vypuścili rasśledavańnie pra toje, što kampanija Alutech abychodzić sankcyi i pastaŭlaje ŭ Jeŭrasajuz padsankcyjnuju pradukcyju. Robić jana heta praz svaju rasijskuju kampaniju i češski łahistyčny centr. 

Sutnaść u tym, što praz tydzień paśla poŭnamaštabnaha ŭvarvańnia Rasii va Ukrainu Jeŭrapiejski sajuz zabaraniŭ uvozić ź Biełarusi mnohija važnyja tavary. Tak chołdynh «Alutech» pazbaviŭsia mahčymaści pastaŭlać u krainy ES paneli, varoty i dźviery sa stali.

Nieŭzabavie nabyła moc zabarona i na impart mietałurhičnaj pradukcyi z Rasii, ale paneli, varoty i dźviery sa stali nie padpali pad novyja abmiežavańni ES. To-bok, ź Biełarusi niekatoruju pradukcyju «Alutecha» ŭ ES vyvozić užo było nielha, a voś Rasiju zabarona nie zakranuła.

«Alutech» skarystaŭsia hetym prałazam, ale jaho dziejnaść pa abychodzie sankcyj zacikaviła pravaachoŭnyja orhany ŭ Jeŭrasajuzie i Vialikabrytanii. Praŭda, pakul rasśledavańnie było spyniena praz adsutnaść dastatkovych padazreńniaŭ.

• 2
• 0
• 0
• 0
• 0
• 0
• 0
• 0