Uznaharodaj dla tych, chto ŭdzielničaje ŭ prakładcy tunelu, źjaŭlajecca prava pieršymi prajści pa im.
Tuneli pad polskim pamiežnym zaharodžvańniem ź biełaruskaha boku prakładvajuć mihranty-kurdy. Pra heta zajaviŭ u efiry RMF FM ministr unutranych spraŭ i administracyi Marcin Kierviński, piša Reform.news.
Pavodle jahonych słoŭ, uznaharodaj dla tych, chto ŭdzielničaje ŭ prakładcy tunela, źjaŭlajecca prava pieršymi prajści pa im. Treba adznačyć, što ŭčora namieśnik Kiervińskaha zhadvaŭ mihrantaŭ ź Siryi, jakija ŭdzielničajuć u prakładcy tunelaŭ.
«Biełaruskija słužby pryvoziać šmat kurdaŭ. Heta byli kurdy. Ja nie viedaju, ci ŭsie hetyja tuneli praryli kurdy, bo heta ŭžo čaćviorty tunel. U hetym udzielničajuć mihranty z Kurdystana, jakija ryjuć tuneli. U ich, nakolki nam viadoma nieaficyjna, jość peŭnyja prefierencyi być pieršymi, chto projdzie praz hety tunel», — skazaŭ jon.
Pa słovach ministra, tunel vyhladaje vielmi prafiesijna zroblenym. Kierviński ličyć, što biełaruskija słužby ŭpeŭnilisia ŭ efiektyŭnaści zaharodžvańnia i ciapier šukajuć novyja sposaby.
Tym nie mienš jon upeŭnieny, što polski bok taksama budzie efiektyŭnym u vyjaŭleńni tunelaŭ. Jon dadaŭ, što z pryblizna 180 mihrantaŭ, jakija prajšli praz tunel u piatnicu, zatrymanyja bolš za 140.
«Hetaja madel pracy zastajecca niaźmiennaj. To-bok heta nielehalnyja imihranty, dastaŭlenyja ŭ Rasiju abo Biełaruś słužbami, rasijskimi abo biełaruskimi. Tut ničoha nie mianiajecca. Bolš za 90% — heta maładyja, zdarovyja mužčyny, jakim, kali možna tak vykazacca, akazvajuć pasłuhi rasijskija abo biełaruskija słužby, zabiaśpiečvajučy ŭsie nieabchodnyja instrumienty, miescaznachodžańnie i ŭmovy ich pracy», — skazaŭ jon.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ86
Kamientary