Čatyrnaccać vydaviectvaŭ, kala paŭtysiačy knih… Zasnavalniki novaj varšaŭskaj kniharni Kamunikat.shop raskazali pra dalejšyja płany
U Varšavie adkryłasia kniharnia Kamunikat.shop — sumiesny prajekt Fondu Kamunikat i Centra biełaruskaj salidarnaści. Kniharnia raźmiaściłasia ŭ pamiaškańniach CBS pa adrasie ul.Oleandrów 6, piša Reform.news.
U kniharni buduć pradavacca nie tolki knihi ad vydaviectva Kamunikat.org (ich pakul kala 70-ci). Na hety momant pradstaŭleny bolš za 500 najmieńniaŭ knih 14 biełaruskich vydaviectvaŭ.
Taksama płanujucca sustrečy ź biełaruskimi aŭtarami, — raskazaŭ na ŭračystym adkryćci kniharni jaje suzasnavalnik (i inicyjatar fondu kamunikat.org) Jarasłaŭ Ivaniuk. Pavodle jaho słovaŭ, tut buduć rehularna prachodzić sustrečy ź litaratarami, prezientacyi novych knih, a taksama tych vydańniaŭ, jakija ŭ svoj čas byli abydzieny ŭvahaj.
Admietnaść kniharni ŭ tym, što tut buduć šyroka pradstaŭleny knihi, vydadzienyja biełaruskaj nacyjanalnaj mienšaściu. Siabra ŭpravy Fondu Kamunikat i pradstaŭnica Centra biełaruskaj kultury ŭ Biełastoku Iłona Karpiuk raskazała pra važnaść jadnańnia vysiłkaŭ i nacyjanalnaj mienšaści na Biełastoččynie, i biełaruskich emihrantaŭ.
Tamu siarod 14 vydaviectvaŭ u kniharni pradstaŭleny Centr biełaruskaj kultury, Prahramnaja rada tydniovika «Niva» i «Muziej małoj baćkaŭščyny» ŭ Studzivodach. Hetyja knihi časta pryśviečany žyćciu na biełaruska-polskim pamiežžy, siarod ich sustrakajucca polskamoŭnyja vydańni, jakija možna budzie ŭbačyć na palicach.
Namieśnik staršyni Abjadnanaha pierachodnaha kabinieta Pavieł Łatuška pakreśliŭ važnaść taho, što biełaruskaja mienšaść i biełaruskaja dyjaspara razam realizujuć hety kulturnicki prajekt.
Dyrektar kirmaša histaryčnaj knihi pan i pradstaŭnik Fundacji Historia i Kultura Valdemar Michalski paviedamiŭ bližejšyja vydavieckija naviny: čarhovy sałon niezaležnych biełaruskich vydaŭcoŭ «Volnaja Biełaruś» adkryjecca na Mižnarodnym knižnym kirmašy ŭ Varšavie, jaki projdzie na Nacyjanalnym stadyjonie z 28 pa 31 maja. 29 maja, a 14 hadzinie tam čakajecca hość — łaŭreat Nobieleŭskaj premii miru Aleś Bialacki.
Uładzimir Arłoŭ prezientavaŭ na adkryćci kniharni šostaje vydańnie «Imionaŭ Svabody», što vyjšła dziakujučy «Kamunikatu». U knizie źmieščana 410 histaryčnych partretaŭ tych, chto z časoŭ Tadevuša Rejtana i Tadevuša Kaściuški zmahalisia za svabodu i niezaležnaść biełaruskaj ziamli.
Kniha vydatna aformlena, jaje novy farmat pryvioŭ da taho, što na razhortach sustrakajucca dva hieroi ci hieraini i ŭstupajuć u dyjałoh. «Heta nadaje knizie novyja sensy i novuju jakaść, — patłumačyŭ Uładzimir Arłoŭ. — Emilija Plater pierahladajecca i viadzie maŭklivy dyjałoh ź jašče adnym hierojem paŭstańnia 1830‑31 hadoŭ Michałam Vałovičam. Sustrakajucca paŭstancy 1863, baćki BNR. Uładzimir Karatkievič i Łarysa Hienijuš».
Rychtujecca druhaja častka vydańnia, jakaja sioleta pabačyć śviet.
«Toj, chto prahnie svabody i za jaje zmahajecca, časta nie dažyvaje da pavažnych hadoŭ, časta čakaje svabody nie ŭ samych kamfartabielnych pamiaškańniach, tamu tut šmat trahičnych losaŭ. Ale kali vy jaje pračytajecie, vy pierakanajeciesia, što heta kniha vielmi aptymistyčnaja, tamu što jana śviedčyć pra toje, što tych, chto prahnie i zmahajecca za svabodu va ŭsie časy było vielmi šmat», — padsumavaŭ Uładzimir Arłoŭ.
Kniharnia pracuje pa adrasie: ul. Oleandrów 6/2 (metro Politechnika)
- z paniadziełka pa piatnicu z 15:00 da 19:00;
- u subotu z 10:00 da 15:00.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?88
Kamientary