Letaś u Biełarusi raspačata 70 kryminalnych spraŭ za parušeńnie aŭtarskich pravoŭ
I kanfiskavana 70 tysiač adzinak kantrafaktnaj pradukcyi,
Kolkaść złačynstvaŭ, źviazanych z parušeńniem pravoŭ intelektualnaj ułasnaści i aŭtarskich pravoŭ u Biełarusi niaŭchilna ŭzrastaje. Pra heta paviedamiŭ namieśnik načalnika adździeła ŭpraŭleńnia pa baraćbie z ekanamičnymi złačynstvami Ministerstva ŭnutranych spraŭ Alaksandr Kuźniacoŭ 12 krasavika ŭ Minsku na bryfinhu dla žurnalistaŭ.
Pavodle jaho słoŭ, kali ŭ 2001 hodzie byli vyjaŭleny adzinkavyja fakty takich pravaparušeńniaŭ, to ŭžo ŭ 2006 hodzie ŭ Biełarusi było raspačata 70 kryminalnych spraŭ za parušeńnie aŭtarskich i sumiežnych pravoŭ, a taksama pravoŭ pramysłovaj ułasnaści, kanfiskavana 70 tysiač adzinak kantrafaktnaj pradukcyi, pryciahnuta da administracyjnaj adkaznaści 456 asob.
Jak zaznačyŭ A.Kuźniacoŭ, kryminalnych spraŭ było b značna bolš, kali b pravaŭładalniki źviartalisia ŭ pravaachoŭnyja orhany čaściej. Čynoŭnik MUS taksama nie vyklučyŭ, što ŭ Biełarusi isnujuć cechi pa vytvorčaści kantrafaktnaj pradukcyi, «viadoma, nie ŭ takich abjomach, jak u Rasii i va Ukrainie, ale dastatkova».
Adnoj z najbolš hučnych spraŭ ab parušeńni aŭtarskich pravoŭ u Biełarusi, jakoj zajmaŭsia adździeł pa baraćbie z ekanamičnymi złačynstvami, śpiecyjalist nazvaŭ spravu ab abaronie aŭtarskich pravoŭ rasijskaha śpievaka Juryja Antonava. U 2006 hodzie śpiavak napisaŭ zajavu ŭ dačynieńni da čałavieka, jaki raźmiaščaŭ u interniecie aŭdyjozapisy biez zhody aŭtara. Padčas rasśledavańnia parušalnik byŭ vyjaŭleny i pryciahnuty da administracyjnaj adkaznaści.
Kamientary