Z usioj krainy

Z usioj krainy

Adzin pratestavaŭ
u Smurhoniach

Tolki adzin čałaviek u Smurhoniach padtrymaŭ “ahulnanacyjanalnuju akcyju pratestu suprać źbiadnieńnia biełaruskaha narodu” — lider miascovaj supołki kamunistaŭ (PKB) Valer Baturyn. Miascovaja ŭłada vyznačyła jamu miesca vydatnaje, na ŭskrajku horadu: z adnaho boku — placoŭka dla vyhułu sabak, z druhoha — kantejnery sa śmiećciem. Žychary najbližejšych chat spačatku dumali, što pikiet pravodzicca suprać taho, što śmiećcie niasvoječasova vyvoziać. Ale razabracca, u čym sprava, dapamahli… milicyjanty, jakija ŭvieś čas cikavilisia pikietčykam — padjaždžali, padychodzili, a niekalki čałaviek u formie naahuł dziažuryli z 11.00 da 13.00 niepadaloku, až pakul akcyja nia skončyłasia. Naprykancy adbyłasia niezvyčajnaja padzieja: miascovyja televizijonščyki, jakija zdymali pikiet, złavili ŭ kadar babulu, što vynosiła košyk z adkidami. Staroj heta nie spadabałasia, i jana kinuła ŭ kameru znošanym botam, pryznačanym dla kantejneru. A potym naahuł źlohku pabiłasia z aperataram. Milicyjanty navat chacieli skłaści na jaje pratakoł. Dy pieradumali. Peŭna, paškadavali.

Taciana Skarynkina, Smurhoni

Nastaŭnik dabiŭsia zarpłaty praz sud

Mikałaj Ułasievič, nastaŭnik bazavaj škoły ŭ Hazie na Astravieččynie, źviarnuŭsia ŭ sud, kab jamu, a taksama ŭsim nastaŭnikam u termin vypłačvali zarobak. Pryčynaj zvarotu stali systematyčnyja zatrymki z vypłataj hrošaj u škołach. Paśla raźbiralnictva, na jakoje byli zaprošany pradstaŭniki vykankamu i adździełu adukacyi, pieramohu atrymaŭ viaskovy nastaŭnik. Sud abaviazaŭ Astraviecki rajonny adździeł adukacyi ŭ vyznačany termin vypłačvać zarobak Ułasieviču. Sud papiaredziŭ zahadčyka adździełu adukacyi Ŭładzimiera Bułavickaha, što za parušeńnie vyraku suda jon budzie aštrafavany na 10 minimałak.

Marjan Vianhroŭski, Astraviec

Da BCHK źmienšyŭsia davier

Na minułym tydni ŭ Kryčavie prajšła pierarehistracyja siabroŭ miascovaha adździaleńnia Biełaruskaha chielsynskaha kamitetu. Ź siami kryčaŭskich pradstaŭnikoŭ pravaabarončaj arhanizacyi tolki dvoje paćvierdzili svajo siabroŭstva ŭ joj. Astatnija piać adraklisia. Pryčynami dla admovy stałasia nizkaja efektyŭnaść sumiesnaj pracy, adarvanaść nizavych struktur ad centru dy padzieńnie davieru jak da asobnych kiraŭnikoŭ, tak i da samoj arhanizacyi.

Andrej Kuźmin, Kryčaŭ

Białynickija “Zubry” adnavili dziejnaść

Białynickija “Zubry” paśla paŭhadovaha pierapynku nahadali pra siabie. Hetym razam zubroŭcy prajavili kłopat ab miestačkoŭcach. U noč ź piatnicy na subotu ŭ padjezdach šmatpaviarchovych damoŭ i ŭ miescach raźmiaščeńnia vizualnaj reklamy źjavilisia ŭlotki. U ich maładyja ludzi, zaniepakojenyja rostam cenaŭ na kamunalnyja pasłuhi, nahadvajuć białyničanam, što tyja, kali ŭ ichnych kvaterach ciakuć krany i ŭ hałalodzicu nie pasypajucca piasčanaj sumieśsiu darohi, nie prybirajecca śnieh z tratuaraŭ i h.d., pavinny źviartacca ŭ žyłkamunhas.

Upieršyniu “Zubr” u Białyničach prymusiŭ zahavaryć pra siabie letaś, kali ŭ noč z 8 na 9 lutaha fasady 65 hramadzkich i žyłych budynkaŭ miastečka byli śpiareščany nadpisam “Zubr”, što nadzvyčaj aburyła i nastroiła suprać jaho bolšaść miestačkoŭcaŭ.

Bazyl Lićvinovič, Białyničy

Na Sojmie KCHP BNF

9 lutaha ŭ Miensku adbyłosia pasiedžańnie Sojmu Kanservatyŭna-chryścijanskaj partyi BNF. Zasłuchali na im dakład Zianona Paźniaka. Razhledzieŭšy aktualnuju palityčnuju sytuacyju, partyjcy vyrašyli praciahnuć kampaniju “Biełaruskaja salidarnaść” pa kansalidacyi biełaruskaha hramadztva, zbor zajavaŭ u hramadzianstva BNR i podpisaŭ u abaronu relihijnaj radyjoprahramy “Hołas dušy”. Asabliva ž važnym siabry partyi ličać hodna adśviatkavać Dzień voli 25 sakavika. Siabry partyi nie pryznajuć lehitymnaści ani prezydenta, ani nacyjanalnaha schodu, ličać isnuju ŭładu niespraviadlivaj. Persanalnaj palityčnaj alternatyvaj režymu jany ličać Zianona Paźniaka i zaklikajuć pravieści daterminovyja vybary prezydenta na demakratyčnaj asnovie pad mižnarodnym pratektaratam.

Admienienyja lhoty knihavydańniu

Z 1 studzienia admienienyja lhoty biełaruskamu knihavydańniu i knihahandlu. Dahetul paŭtara hodu vydaŭcy nie płacili PDV i padatku na prybytak, a kniharni — za arendu. Ministerstva infarmacyi vyjšła z chadajnictvam u abłvykankamy, kab arenda dla kniharań była choć by tańniejšaj.

Pakazčyki rastuć

Pavodle infarmacyi Ministerstva statystyki i analizu, u Biełarusi praciahvajecca rost vałavoha ŭnutranaha praduktu. U sioletnim studzieni ŭ paraŭnańni ź letašnim jon pavialičyŭsia na 3,6%. Vyrasła jak pramysłovaja (na 2,9%), tak i sielskahaspadarčaja (na 1,5%) vytvorčaść, investycyi ŭ asnoŭny kapitał (na 11,8%), uviedziena ŭ ekspluatacyju na 4,2% bolš žylla. Roźničny tvarazvarot pavialičyŭsia na 17,8%, abjom płatnych pasłuh — na 10,7%.

Novyja pryznačeńni

Vadzim Mielnik pryznačany pieršym namieśnikam, a Ivan Hierłoŭski i Hleb Parchamovič — namieśnikami staršyni Dziaržkamitetu pa avijacyi, Siarhiej Bułacki — namieśnikam ministra infarmacyi, Vasil Puhačoŭ — pieršym namieśnikam ministra zamiežnych spravaŭ Biełarusi, Mikałaj Ivančanka — dyrektaram Biełaruskaha kancernu pa materyjalnych resursach, Hienadź Padhorny — dyrektaram fondu dziaržaŭnaj majomaści Ministerstva ekanomiki. Cikava, što Alaksandar Dubko pryznačany namieśnikam staršyni Mahiloŭskaha abłvykankamu.

Uł.inf. i pavodle BiełaPAN

Redaktary prosiać nie spyniać cisku

Redaktary “Pahoni” Mikoła Markievič, “Narodnaj voli” Iosif Siaredzič, “Biełorusskoho rynka” Viačasłaŭ Chadasoŭski i vice-prezydent Biełaruskaj asacyjacyi žurnalistaŭ Andrej Bastuniec na minułym tydni sustrelisia z pradstaŭnikami Dziarždepartamentu ZŠA i pravaabarončych arhanizacyjaŭ. Na presavaj kanferencyi ŭ Vašynhtonie, jakaja adbyłasia 7 lutaha, jany zajavili, što z času vieraśnioŭskich vybaraŭ stanovišča niezaležnaj presy ŭ Biełarusi tolki pahoršyłasia. Žurnalisty zaklikali Zachad nie spyniać cisku na biełaruskija ŭłady.

Pavodle radyjo “Svaboda”

List u padtrymku Markieviča j Mažejki

Dziasiatki žurnalistaŭ i hramadzkich dziejačaŭ Haradzienščyny pastavili svaje podpisy pad adkrytym listom da prakurora vobłaści Vasila Litvinava. Padpisanty prosiać prakurora “vykazać svaju hramadzianskuju acenku mahčymaha pryciahnieńnia da kryminalnaj adkaznaści žurnalistaŭ Paŭła Mažejki i Mikoły Markieviča”. Padpisanty pierakanany, što “žurnalisty Pavał Mažejka i Mikoła Markievič – nijakija nie złačyncy, a ludzi sumlennyja, z aktyŭnaj hramadzianskaj pazycyjaj, patryjoty Biełarusi. Pieraśled takich ludziej… jość spravaju antydziaržaŭnaju, škodnaju dla krainy. Jon dyskredytuje Biełaruś i jaje pravaachoŭnyja orhany ŭ vačach mižnarodnaj supolnaści”. Padpisanty zaklikajuć spynić spravu suprać žurnalistaŭ.

Uł.inf.

13 lutaha a 15-j redaktar hazety “Pahonia” Mikoła Markievič byŭ vyklikany ŭ Haradzienskuju abłasnuju prakuraturu. Tam jamu pradjavili abvinavačańnie pa č.2 art. 367 Kryminalnaha kodeksu. 14 lutaha ab 11-j hetkaje samaje abvinavačańnie pradjavili Paŭłu Mažejku. U Markieviča doma apisali majomaść.

paciarpiełyja za Biełaruś

Za minuły miesiac: u Viciebsku zatrymanyja dva Valery – Vysocki i Paŭłoŭski, Uładzisłaŭ Tokaraŭ i Siarhiej Šapira, siabry BNF, jakija zładzili pikiet suprać źbiadnieńnia narodu. Škłoŭski rajonny sud aštrafavaŭ redaktara hazety “Škłoŭskija naviny” Alaksandra Ščarbaka na 10 minimałak i kanfiskavaŭ jahonuju arhtechniku. Sud ličyć, što Ščarbak vypuściŭ letaś numar nakładam bolšym za 299 asobnikaŭ, što niezarehistravanamu vydańniu zabaraniajecca. Prakuratura Miensku viadzie kryminalnuju spravu suprać pres-sakratara niezarehistravanaha ruchu “Zubr” Alaksandra Atroščankava pa artykule 368 KK RB – źniavaha prezydenta. U Homieli sud pastanaviŭ kanfiskavać u “Hramadzianskich inicyjatyvaŭ” 5 kamputaraŭ i 2 pryntery, a taksama aštrafavać kiraŭnika abjadnańnia Viktara Karnijenku na miljon rubloŭ.

Ceny ŭ studzieni vyraśli na 6,1%. Heta samy vysoki za apošnija 16 miesiacaŭ uzrovień inflacyi. Vyšejšy pakazčyk byŭ tolki ŭ vieraśni 2000 h. — 6,8%. U śniežni 2001 h. spažyvieckija ceny vyraśli na 5,5%, u studzieni 2001 h. — na 4,8%. Pa raźlikach uradu, u 2002 hodzie rost spažyvieckich cen pavinien skłaści ad 20 da 27 pracentaŭ. Takim čynam, čverć “dystancyi” projdzienaja za adzin miesiac. Dla paraŭnańnia: u studzieni biahučaha hodu spažyvieckija ceny ŭ Kazachstanie pavialičylisia na 0,7, va Ukrainie — na 1, u Rasiei — na 3,1%.

KVITKI NA CIAHNIKI padaražejuć napałovu. Kab čyhunka nia mieła strataŭ, hramadzianam treba apłačvać 35% ad sapraŭdnaha koštu prajezdu. Raniej nizkija taryfy dla nasielnictva kampensavali dziakujučy pieravozkam hruzaŭ, adnak letaś popyt na hetuju pasłuhu źmienšyŭsia.

12 ČAŁAVIEK ZAHINULI na pracy ŭ studzieni, jašče 35 nazaŭždy stali invalidami. Inspektary pa achovie pracy kažuć, što z-za sastarełaha abstalavańnia ryzyka atrymać traŭmu isnuje na 80% pradpryjemstvaŭ.

237 PRADPRYJEMSTVAŬ ZBANKRUTAVALI letaś. Ciapier u haspadarčych sudach razhladajucca sotni spraŭ ab bankructvach, u tym liku takich bujnych pradpryjemstvaŭ, jak były vajskovy zavod “Kalibr” dy Mienski hadzińnikavy zavod.

MIENSKI MARHARYNAVY ZAVOD chočuć kupić rasiejcy. Jahonaja zapazyčanaść siahaje pad 3,5 młn. dalaraŭ.

ELEKTRYČNAŚĆ DARAŽEJE na čverć. Hramadzianie, što majuć elektraplity, buduć płacić 17,4, a tyja, chto karystajecca hazam, — 24 rubli za kilavat-hadzinu.

BOLŠ JEŚCI I PIĆ stali biełarusy ŭ 2001 h.. “Siaredni” žychar krainy štomiesiac spažyvaŭ 8 litraŭ małaka ci kiefiru, 4,7 kh miasa, 12 ryby, pa 2 kh muki, krupaŭ, cukru i makarony. Kolki jeli bulby, statystyka nia viedaje: vyličyć uradžaj z pryvatnych siadzibaŭ niemahčyma.

ZVOLNIĆ 10% PERSANAŁU źbirajucca na traktarnym zavodzie. Biaz pracy mohuć zastacca kala 2 tys. čałaviek.

TRAMVAJ z troch złučanych častak vyrabili na zavodzie “Biełkamunmaš”. Jechać u im mohuć 302 pasažyry za raz.

90 aŭtobusaŭ MAZ kupić Rumynija. Na zavodzie nazyvajuć ździełku nadta ŭdałaj, bo za ŭvieś minuły hod tut pradali tolki 436 aŭtobusaŭ.

AD 13 DA 80% IMPARTNYCH CYHARETAŬ i cyharaŭ (u zaležnaści ad rehijonu) trapili letaś ŭ handal Biełarusi nielehalna. Pazaletaś “šeraha tytuniu” było ŭdvaja mieniej.

PRYVATNAJA ZABUDOVA ŭ stalicy zastaniecca, bo Mienharvykankam nia maje hrošaj, kab źnieści 17 tysiač draŭlanych damoŭ i dać ludziam novyja kvatery. Bližejšymi hadami na “pryvatnych” vulicach chiba zamieniać asfalt, inžynernyja sietki dy lichtary.

Zhodna z novym ukazam prezydenta, stracili siłu niekatoryja jaho raniejšyja dekrety, uviedzienyja ŭ 1998—99 h. i nakiravanyja na abaronu spažyvieckaha rynku. Tady naziraŭsia deficyt niekatorych praduktaŭ u suviazi ź ich masavym vyvazam za miažu — u Rasieju i Ŭkrainu. Dekrety davali prava orhanam ułady vyznačać hraničnyja normy realizacyi tavaraŭ i nakładać abmiežavańni na ich vyvaz. Ciapier takoj patreby ŭžo niama: bolš adtul viazuć.

Ihnalinskaja AES paśla ramontu adnaviła ekspart elektryčnaści ŭ Biełaruś. U studzieni litoŭcy pradali nam 350 młn. kvt/hadzinaŭ, ci blizu 12% ad zvyčajnaj patreby našaha nasielnictva i pradpryjemstvaŭ u miesiac.

Siaržuk Ivanoŭski