Nia być Kazetaj

Na fonie ažyjatažu vakoł eŭrapiejskaha «dranh nach osten» cikava čytać, što dumajuć sami eŭrapiejcy pra svaich novych susiedziaŭ pa EZ.

Francuski satyryčny tydniovik «Charle-Hebdo» pryvitaŭ rašeńnie ab uvachodzie novych siabroŭ vializnym zahałoŭkam «Pašyreńnie Eŭropy. Madam Tenardje viartajecca». Tenardje — persanaž «Adrynutych» Hiuho, jakaja ekspluatavała davierlivuju małuju Kazetu.

Resursy dziesiaci novych siabroŭ EZ składajuć 4,6% bahaćcia adzinaccaci «starych». Brusel nie pahadziŭsia refarmavać na karyść novych siabroŭ prahramu PAC (Supolnaja ahrarnaja palityka), na jakuju prypadaje 40% biudžetu EZ. Ministar sielskaj haspadarki Francyi skazaŭ: kali francuski fermer nie atrymaje 9,4 młrd. eŭra, «sialanskaj cyvilizacyi francuzaŭ» — kaniec. U vyniku vyrašana, što buduć subsydavać nia bolej za 25% vydatkaŭ ahrarnaha sektaru novych siabroŭ EZ. Zhodna z rašeńniem Eŭrakamisii, tolki praź dziesiać hadoŭ dziesiać novych siabroŭ EZ mohuć raźličvać na dapamohu, ekvivalentnuju toj, jakuju atrymlivajuć siońnia staryja krainy Źviazu.

Z 2000 h. ahulnaja suma dapamohi novym siabram składała try miljardy eŭra štohod. Jana była padzielenaja miž usimi kandydatami. Try miljardy — heta pałova taho, što atrymała Hišpanija napiaredadni ŭvachodu ŭ EZ na restrukturyzacyju svajoj haspadarki. Dasiul niama i planu kampensacyi ekanamičnych strataŭ ad uvachodu ŭ EZ.

Heta značyć, što krainy «Novaj Eŭropy», kab vyžyć, pavinny stvarać dla investaraŭ pryvablivyja ekanamičnyja prajekty. Sacyjalny dempinh i skasavańnie padatkaŭ (ź jakich, darečy, finansujecca kultura) — nie apošnija faktary ŭ zaachvočvańni zamiežnych investycyjaŭ. Jak iranizuje «Charle-Hebdo», pašyreńnie EZ — śviata dla francuskaha pradprymalnickaha sajuzu MEDEF. Dziakujučy pašyreńniu biznesmeny na durnia atrymali 75 młn. «kazetaŭ».

Ci značyć, što levyja suprać Eŭropy? Intehracyja — heta nie «restaŭracyja histaryčnaha adzinstva eŭrapiejskich narodaŭ» (Ramana Prodzi), a bolš składanaja afera ź dźviuma supraćlehłymi tendencyjami. Umovy, jakija stavić Brusel novym siabram, adpaviadajuć dahmatam nealiberalizmu: demantaž sacyjalnaha sektaru, nivelavańnie kulturaŭ, zdača suverenitetaŭ na karyść novych elitaŭ i h.d. Ź inšaha boku, eŭraintehracyja — viasioły prajekt samich hramadzianaŭ, jaki moža stvaryć kulturnuju i sacyjalnuju prastoru z tvorčymi patencyjami dla kožnaha indyvida. Levyja za toje, kab nia być Kazetaj: mieniej iluzijaŭ nakont EZ i bolej ruchu, kab źmianić praviły hulni ŭ eŭrapiejskaj intehracyi na svaju karyść. Prabačcie za patas.

Lolik Uškin

• 0
• 0
• 0
• 0
• 0
• 0
• 0
• 0