Дэбютная стужка Аляксея Балабанава і тэлевізійная вэрсія Франкенштэйна.
На экране дэбютная стужка Аляксея Балабанава і тэлевізійная вэрсія Франкенштэйна.
Шчасьлівыя дні (Счастливые дни)
Расея, 1991, чорна-белы, 86 хв.
Рэжысэр: Аляксей Балабанаў
Ролі выконваюць: Віктар Сухарукаў, Анжаліка Няволіна, Яўген Мяркур’еў, Георгі Тэйх, Мікалай Лаўроў
Жанр: Абсурдысцкая драма паводле твораў Сэмюэля Бэкета
Прызы: Прыз журы крытыкаў на кінафэсьце ў Зарэчным, прыз за лепшы поўнамэтражны фільм на кінафэсьце “Дэбют” (Масква)
Адзнака: 6 (з 10)
Пасьля раненьня ў галаву герой стужкі (Віктар Сухарукаў) згубіў памяць і страціў повязі з рэальным жыцьцём. Зь лябараторыі яго выштурхнулі на вуліцу, дзе ён бадзяецца й ня здольны знайсьці сябе. Чалавеку падабаецца прыгажуня (Анжаліка Няволіна), але яна не зьбіраецца адказваць на ягонае каханьне, бо занятая ў найстаражытнай прафэсіі…
Дзіўны, абсурдовы, вязкі і халодны фільм. Дэбютная поўнамэтражная стужка Аляксея Балабанава, адметная цэласным выкшталцоным стылем і пранізьлівым адчужэньнем. Зьлякана-непрыкметны Віктар Сухарукаў, бязьвінна-драпежная Анжаліка Няволіна – і попельна-шэрыя савецка-бэкетаўскія сьненьні.
Франкенштэйн (Frankenstein)
Славаччына – ЗША, 2004, каляровы, 204 хв (тэлевізійны сэрыял)
Рэжысэр: Кевін Конар
Ролі выконваюць: Люк Гос, Алек Ньюмэн, Джулі Дэмпі, Дональд Сазэрлэнд, Моніка Хільмерава, Ўільям Гёрт, Лаяна Бамбэрг
Жанр: Фільм жахаў паводле аднайменнага рамана Мэры Шэлі
Прызы: Прэмія “Эмі” Беатрыкс Далінгеравай за найлепшы грым
Адзнака: 5,5 (з 10)
Малады навуковец Віктар Франкенштэйн зацята дасьледуе невядомае. У сваёй лябараторыі з частак памерлых целаў ён зьбірае і ажыўляе новую істоту. Але пачвара, абражаная агідаю свайго бацькі, пачынае помсьціць свайму стваральніку…
Тэлевізійная экранізацыя клясычнага раману жахаў, зьдзейсьненая каналам Hallmark, даслоўна сьледуе за арыгіналам. Атмасфэра ХІХ стагодзьдзя (самае каштоўнае ў фільме), гатычныя разваліны ў гарах (дзе навуковец і ягонае стварэньне вядуць маральны двубой), палярныя ільды.
Няшчасна-рамантычная ажыўленая істота (Люк Гос), бунтар-навуковец (Алек Ньюман), багабаязны прафэсар (Ўільям Гёрт), сумленны капітан (Доналд Сазэрлэнд).
Нетаропкі фільм расьцягнуты на некалькі сэрый і, адпаведна аўдыторыі, вызвалены ад жорсткасьцяў.
Цяпер чытаюць
Дзядок расказаў, як паводзіў бы сябе ў сённяшняй Беларусі і што будзе далей4
Каментары