The Economist: Крэмль прапанаваў сям'і Трампа за зняцце санкцый долі ў энергетычных актывах
Крэмль нібыта прапанаваў людзям, блізкім да сям’і прэзідэнта ЗША Дональда Трампа, долі ў расійскіх энергетычных праектах у абмен на змякчэнне або зняцце амерыканскіх санкцый. Пра гэта са спасылкай на інфармаваныя крыніцы паведаміла выданне The Economist.
Паводле гэтых звестак, гаворка можа ісці пра ўдзел у здабычы нафты і газу ў Арктыцы, распрацоўцы радовішчаў рэдказямельных металаў, стварэнні дата-цэнтра з ядзерным энергазабеспячэннем, а таксама пра будаўніцтва тунэля пад Берынгавым пралівам.
Крыніцы сцвярджаюць, што перад леташняй сустрэчай Уладзіміра Пуціна з Трампам на Алясцы для Рады бяспекі Расіі падрыхтавалі дакумент з прапановай прадставіць амерыканскаму боку маштабную эканамічную здзелку. У ім Расію апісвалі як краіну з вялікімі запасамі арктычных і паўночных рэсурсаў, у якія нібыта будуць гатовыя інвеставаць фонды з ЗША і іншых дзяржаў. Адзначалася, што гэта можа прынесці значныя прыбыткі і нават спрыяць атрыманню Нобелеўскіх прэмій лідарамі дзвюх краін. Разам з тым, як піша выданне, прадстаўнікоў Трампа асабліва цікавяць долі ў буйных праектах, здольных паўплываць на сусветныя сыравінныя рынкі.
Раней прэзідэнт Украіны Уладзімір Зяленскі, спасылаючыся на даныя разведкі, заяўляў, што Масква прапанавала Вашынгтону здзелку на 12 трыльёнаў даляраў у абмен на паслабленне санкцый. Аднак The Economist адзначае, што такія ацэнкі выглядаюць значна перабольшанымі і могуць быць разлічаныя на тое, каб зрабіць прапанову больш прывабнай для Трампа.
Паводле падлікаў выдання, нават пры аднаўленні аб’ёмаў імпарту і вяртанні замежных кампаній на расійскі рынак магчымыя прыбыткі былі б значна меншымі. Каб наблізіцца да сумы ў 12 трыльёнаў даляраў, такія даходы павінны былі б захоўвацца на працягу многіх дзесяцігоддзяў. У матэрыяле таксама выказваецца меркаванне, што ў выпадку аднаўлення шырокага гандлю і інвестыцый расійская эканоміка магла б умацавацца.
Пытаннямі ўрэгулявання вайны ва Украіне ў адміністрацыі Трампа займаюцца яго спецпасланнік Стыў Уіткаф і зяць Джарэд Кушнер, якія падтрымлівалі кантакты з расійскім бокам. Раней ЗША прапанавалі мірны план, узгоднены з Кіевам і еўрапейскімі саюзнікамі, і адбылося некалькі раўндаў трохбаковых перамоў. Па словах Зяленскага, Вашынгтон хацеў бы завяршыць вайну да чэрвеня, бо пазней увага Белага дома будзе скіраваная на прамежкавыя выбары.
Трамп заявіў, што Пуцін гатовы да здзелкі. Каб толькі Зяленскі не спудлаваў
Зяленскі: Пуцін не сядзіць у турме — гэта самы вялікі кампраміс, на які пайшоў свет
«Мы пайшлі на шмат кампрамісаў». Зяленскі выказаўся пра саступкі пад ціскам ЗША
Пуцін на перамовах з Трампам просіць вярнуць Расію ў даляравую сістэму
Каментары
Или только предлагает купить? Тогда, получается, - еще не купил?
Наладьте коммуникацию между нейронами, напрягитесь.