У штогадовым рэйтынгу ўкраінскага Forbes даччыная кампанія «Беларускай нафтавай кампаніі» і «Беларуснафты» « БНК-Украіна» заняла 30-е месца.
У параўнанні з мінулым годам яна паднялася на шэсць пазіцый. Вырасла яе выручка і прыбытак.
У рэйтынгу, складзеным на падставе дадзеных па выручцы за 2012 год, «БНК-Украіна» заняла 30-е месца з аб'ёмам выручкі 9450 млн грыўняў (1,155 млрд даляраў). Чысты прыбытак «БНК-Украіна» у цяперашнім перыядзе склаў 50 млн грыўняў (6,1 млн даляраў).
Як адзначана аўтарамі рэйтынгу, «беларускае паліва працягвае скараць украінскі рынак».
«У мінулым годзе «Беларуская нафтавая кампанія» ўвезла ў Беларусь 3,8 млн тон паліва. На нафтапрадукты з суседняй краіны сёння прыпадае каля 40% імпарту. Асвоіўшыся на аптовым рынку, «дачка» БНК спрабуе сілы ў паліўным рытэйле. У гэтым годзе кампанія адкрыла першыя 10 заправак», — гаворыцца ў каментары.
У канцы 2012 Антыманапольны камітэт Украіны даў дазвол «БНК-Украіна» на набыццё нафтабазы ў Жытомірскай вобласці.
Сярод прадпрыемстваў нафтагазавага сектара «БНК-Украіна» заняла шостае месца, прапусціўшы наперад WOG, «Укртатнафту», «Газтэк», канцэрн «Галнафтагаз» і «ТНК-BP Камерс».
У параўнанні з рэйтынгам-2012, у якім былі адлюстраваныя паказчыкі за 2011 год, «БНК-Украіна» паднялася на шэсць пазіцый. У 2011 годзе яе выручка складала 7197 млн грыўняў (880 млн даляраў), а прыбытак 11 млн грыўняў (1,3 млн даляраў).
У новым рэйтынгу Forbes «БНК-Украіна» апярэдзіла па паказчыках такія кампаніі, як Roshen, Cargill Украіна, «Лукойл-Украіна», «Газпрам Збыт Украіна», «Матор Січ», Procter&Gamble Украіна.
Тройку лідараў рэйтынгу склалі, як і ў мінулым годзе, «Метінвест» (металургія), ДТЭК (энергетыка ) і «Індустрыяльны саюз Данбаса» (металургія). У параўнанні з леташнім рэйтынгам ДТЭК паднялася на другое, а ІСД апусціўся на трэцяе месца.
Каментары