Зімовае надвор'е прыйдзе ў Беларусь у пачатку наступнага тыдня
У Мінску мінусавыя тэмпературы чакаюцца ад аўторка або серады.
Зімовае надвор'е прыйдзе ў Беларусь ужо ў пачатку наступнага тыдня, паведаміў начальнік службы гідраметэаралагічных прагнозаў Рэспубліканскага гідраметэацэнтра Дзмітрый Рабаў.
«Разам з паўночнымі вятрамі ў Беларусь прыйдзе прыкметнае пахаладанне», — адзначыў Рабаў.
Месцамі выпадзе кароткачасовы снег, на асобных участках дарог чакаецца галалёдзіца. Тэмпература паветра на поўначы чакаецца да мінус 7, на поўдні будзе вагацца каля нуля.
Сярэднемесячныя тэмпературы снежня чакаюцца ў межах кліматычнай нормы, характэрнай для гэтага часу года.
У цэлым па рэспубліцы тэмпература паветра будзе вагацца ад мінус 2 градусаў па паўднёвым захадзе да 5 градусаў са знакам мінус па паўночным усходзе краіны.
«На большай частцы тэрыторыі краіны ўсталюецца снежнае покрыва, — дадаў Дзмітрый Рабаў. - А да канца першага месяца зімы яго вышыня можа дасягнуць 4-10 см, прычым ад 18 да 22 дзён месяца будуць снежнымі».
Колькасць ападкаў чакаецца ў межах сярэдніх шматгадовых значэнняў — ад 32 да 44 мм. Да 15 дзён месяца будуць туманнымі, прыкладна цягам 5 дзён чакаецца завіруха.
«Гэта папярэдні прагноз, які апраўдваецца на 70%», — падкрэсліў Дзмітрый Рабаў.
У Беларусі самы цёплы снежань назіраўся ў 2006 годзе, калі сярэднямесячная тэмпература паветра склала плюс 2,6 градуса. Самы халодны першы зімовы месяц быў зафіксаваны ў 1978 годзе: тады сярэдняя тэмпература паветра за месяц склала мінус 10 градусаў.
Цяпер чытаюць
Былога вайскоўца з Брэста, які вярнуўся з Польшчы, абвінавацілі ў «тэрарызме» і адправілі ў калонію1
Каментары