У Гомелі зладзюжка, што крала элітны алкаголь, спалілася на белым паліто
Жыхарка Гомеля панадзілася ў адной і той жа краме красці элітны віскі, каньяк і брэндзі. Заставацца беспакаранай ёй удавалася тры месяцы, піша «Белка» са спасылкай на пракуратуру.
З-за прыхільнасці да алкаголю і наркотыкаў у гамяльчанкі забралі дзяцей. З яе заробку на іх утрыманне вылічвалі значную суму. Грошы на асабістыя патрэбы жанчына вырашыла здабываць злачынным шляхам.
Яна пачала красці ў краме дарагі алкаголь і прадаваць яго на рынку. Сама яна на той момант ужо прайшла лячэнне ў наркадыспансеры і не ўжывала спіртнога.
Каб не прыцягваць увагі, знаходлівая гамяльчанка прыходзіла ў краму ў розным адзенні. Яна выбірала момант, калі ў патрэбным аддзеле нікога не было, хавала бутэлькі ў пакет або ў штаны, пасля чаго спакойна выходзіла з гандлёвай залы.
Жанчына наведвала гандлёвую цэнтр па пяць—сем разоў на месяц. Яна старалася браць тавар да 400 рублёў, каб у выпадку затрымання адкараскацца дробным крадзяжом.
Нястача элітнага спіртнога амаль на 2 тысячы рублёў выявілася падчас інвентарызацыі. Начальнік аддзела аховы аб’ектаў гандлёвай сеткі, праглядаючы запісы з камер відэаназірання, звярнуў увагу на жанчыну ў белым паліто.
Прыгледзеўшыся, ён зразумеў, што ўжо раней лавіў гэтую наведвальніцу крамы на дробных крадзяжах.
«Раней судзімую за падобныя злачынствы гамяльчанку чакае чарговы суд. Паводле часткі першай артыкула 205 Крымінальнага кодэкса Беларусі ёй пагражае пакаранне да трох гадоў пазбаўлення волі», — расказала старшая памочніца пракурора горада Алена Амельяновіч.
Каментары