У 2013 годзе чысты прыбытак беларускіх прадпрыемстваў склаў 42,48 трлн. рублёў і зменшыўся ў параўнанні з 2012 годам на 40,7%, сведчаць даныя афіцыйнай статыстыкі.
У грашовым выражэнні аб'ём чыстага прыбытку, заробленага прадпрыемствамі краіны, скараціўся на 29,1 трлн. рублёў.
Варта зазначыць, што значнае зніжэнне чыстага прыбытку летась было зафіксаванае ва ўсіх абласцях і ў Мінску. У Брэсцкай вобласці велічыня чыстага прыбытку арганізацый скарацілася на 44,6% у параўнанні з 2012 годам, у Віцебскай — на 61,4%, у Гомельскай — на 30,2%, у Гродзенскай — на 32,6%, у Магілёўскай — на 41,5%, у Мінскай — на 54,2%.
У сталіцы, на долю якой прыпадае амаль 40% сукупнага рэспубліканскага даходу, чысты прыбытак прадпрыемстваў зменшыўся ў 2013 годзе на 31,9% у параўнанні з пазалеташнім годам.
Разам са зніжэннем прыбытку ў 2013 годзе адбыўся значны рост стратных арганізацый і велічыні стратаў, якія такія прадпрыемствы атрымалі.
Так, па выніках мінулага года ў краіне былі зафіксаваныя 752 стратныя арганізацыі (супраць 426 у 2012 годзе). Доля стратных арганізацый ад агульнай колькасці прадпрыемстваў дасягнула 9,1% (у 2012 — 5,2%).
Велічыня стратаў, якія атрымалі такія арганізацыі ў 2013 годзе, склала 8,8 трлн. рублёў і павялічылася ў параўнанні з 2012 годам у 2,65 разу. У прыватнасці, сума чыстых стратаў сталічных арганізацый склала па выніках 2013 года 2,53 трлн. рублёў (амаль у 2,5 разу больш у параўнанні з 2012 годам). Найбольшы рост адмоўнага паказчыка зафіксаваны ў Гродзенскай і Брэсцкай абласцях — сума стратаў там павялічылася ў 4,2 і 3,5 разу адпаведна ў параўнанні з 2012 годам.
Міністэрства эканомікі раней тлумачыла пагаршэнне фінансавых паказчыкаў прадпрыемстваў цяжкасцямі са збытам айчыннай прадукцыі і павелічэннем у сувязі з гэтым складскіх запасаў. Прадстаўнікі міністэрства таксама зазначалі, што ўступленне Расіі ў СГА прывяло да ўзмацнення канкурэнцыі і выцяснення беларускіх вытворцаў з традыцыйнага рынку збыту.
Як паведамлялася раней, прадпрыемствы ва ўсіх абласцях Беларусі таксама ў студзені—лістападзе 2013 года канстатавалі зніжэнне рэнтабельнасці продажу ў параўнанні з аналагічным перыядам 2012 года. Прыкладна 80% раёнаў Беларусі сутыкнуліся летась са зніжэннем рэнтабельнасці прадпрыемстваў, што знаходзяцца на іх тэрыторыі.
Цяпер чытаюць
Хто з беларусаў трапіў на прыём да прэзідэнта Польшчы ШМАТ ФОТА37
Каментары