Я не памяняла сваё меркаванне і сапраўды лічу, што ад сельскіх саветаў трэба адмаўляцца, што мясцовае самакіраванне можна выконваць іншымі спосабамі», — заявіла ў інтэрв`ю БелаПАН старшыня Цэнтрвыбаркама Лідзія Ярмошына.
«Ну давайце абіраць старшыню сельсавета, ён і будзе той абраны мэр, тое самае мясцовае самакіраванне. Прынамсі, конкурс на такую пасаду будзе», — лічыць яна.
Паводле слоў Ярмошынай, пасада старшыні сельсавета «наўрад ці з`яўляецца зайздроснай, за выключэннем нейкіх курортных зон, дзе зямля прывабная». «А ў звычайнай глыбінцы, даволі дэпрэсіўных месцах, зарплата невялікая, адказнасць жа высокая», — адзначыла кіраўнік ЦВК.
«Думаю, ад сельскіх і пасялковых саветаў трэба адыходзіць, бо ўсе тыя людзі, якія абіраюцца ў гэтыя саветы, большай часткай і так працуюць на пасадах кіраўнікоў, гэта значыць абавязаныя ў той ці іншай меры дапамагаць выбаршчыкам», — сказала яна.
Ярмошына адзначыла, што цяпер нізкая прывабнасць мясцовых саветаў праяўляецца ў вялікай колькасці безальтэрнатыўных акруг.
«Дэпутаты мясцовых саветаў — гэта проста малапрывабныя пасады. Бо статус дэпутата нічога, акрамя працы, не цягне для будучага народнага абранніка. Для паспяховага чалавека няма стымулу станавіцца дэпутатам», — мяркуе яна.
Паводле слоў кіраўніка ЦВК, у сталіцы статус дэпутата Мінгарсавета хоць матэрыяльна не прыцягвае, але гэта ўсё-такі прэстыж, магчымасць нейкім чынам садзейнічаць бізнесу, дзейнасці структуры або прадпрыемства, дзе працуе сам дэпутат. «Гэта можа быць яго кар`ерны рост. А ў сельскай мясцовасці ніякіх кар`ерных перспектыў статус дэпутата не дае», — заявіла Ярмошына.
Яна таксама адзначыла, што аб вылучэнні кандыдатаў у мясцовыя саветы турбуецца ў тым ліку і ўлада.
«Трэба паглядзець на рэчы рэальнымі вачыма і не рабіць выгляд, што гэта ў нас па волі народа пабеглі вылучацца па выбарчых акругах. Не, таму што мясцовая ўлада паклапацілася, не разлічвала на грамадзян, падабрала людзей, перагаварыла з кожным з іх, папрасіла вылучыцца тым ці іншым спосабам. А можа быць, і працоўныя калектывы папрасілі кіраўнікоў прадпрыемстваў вылучыць людзей. Калі б гэтага не было зроблена, калі б усе сядзелі і чакалі каля мора надвор`я, то маглі б быць наогул пустыя выбарчыя акругі», — сказала Ярмошына.
Цяпер чытаюць
Пра Мелказёрава ў яго апошні дзень: «Было адчуванне, што ён стомлены, бракуе энергіі, рысы твару былі запалыя»1
Каментары