У Літве арыштавалі групу, якая дапамагала ваенпраму Расіі і Беларусі за еўрапейскія грошы. У ёй былі і беларусы
Літоўская Служба расследавання фінансавых злачынстваў разам з Дэпартаментам дзяржаўнай бяспекі вядзе расследаванне дзейнасці арганізаванай групы, якую падазраюць у махлярстве з мэтай незаконнага атрымання фінансавай дапамогі Еўрапейскага саюза і падробцы дакументаў. Справу каардынуе Еўрапейская пракуратура, паведамляе Delfi.lt.
Паводле матэрыялаў следства, у схему былі ўцягнутыя кампаніі, зарэгістраваныя ў Літве, але звязаныя з расійскай і беларускай вайсковай прамысловасцю, якая знаходзіцца пад санкцыямі ЕС. Мяркуецца, што група ўжо незаконна атрымала каля паўмільёна еўра.
Падазрэнні выставілі шасці асобам, у тым ліку аднаму юрыдычнаму суб’екту, праведзеныя ператрусы.
Высветлілася, што грамадзяне Літвы, Расіі і Беларусі стварылі ў Літве высокатэхналагічныя прадпрыемствы, праз якія атрымлівалі еўрапейскія сродкі, а вырабленую прадукцыю вывозілі ў Расію і Беларусь. Гаворка ідзе пра мікрасхемы, паўправаднікі, навігацыйныя сістэмы і іншыя тэхнічныя прыстасаванні.
Для атрымання фінансавання падазраваныя нібыта падавалі фальшывыя дакументы ў Агенцтва ЕС па касмічнай праграме, плануючы праект коштам больш за мільён еўра, значную частку якога павінна было пакрыць ЕС. Частку гэтых грошай кампанія ўжо паспела атрымаць.
Следчыя лічаць, што вывезеная з Літвы прадукцыя магла выкарыстоўвацца ў расійскай і беларускай вайсковай прамысловасці, што парушае заканадаўства і ўяўляе пагрозу нацыянальнай бяспецы Літвы і ўсяго Еўрапейскага Саюза. Члены групы мелі сувязі з прадпрыемствамі, якія трапілі пад санкцыі ЕС.
У 2025 годзе дзве літоўскія кампаніі, звязаныя са справай, былі афіцыйна прызнаныя пагрозай бяспецы ЕС.
У снежні пачалася маштабная аперацыя: у розных гарадах правялі больш за дзесяць ператрусаў, затрымалі падазраваных, у тым ліку аднаго з арганізатараў — грамадзяніна Беларусі з дазволам на жыхарства ў Літве. Адзін чалавек узяты пад варту, яшчэ двух іншаземцаў працягваюць шукаць.
Літоўскія дэпутаты звярнулі ўвагу на справу грамадзяніна Літвы Сяргея Ботвіча, які галадае ў «Воўчых Норах»
Міністр абароны Літвы: Грошы ад транзіту беларускага калію праз Літву можна пералічваць Украіне
Гібрыдныя атакі і кантрабанда: Літва ўзмацняе ўвагу да мяжы з Беларуссю
Спікер Сейма Літвы дапусціў змяненне адносін з Беларуссю: адны толькі санкцыі даюць вынік, але не канчатковы
Літва нанесла маштабны ўдар па «балонікавай» мафіі: затрыманыя кіраўнікі і дзясяткі кантрабандыстаў
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі32
Каментары