Прадстаўнікі Асацыяцыі апекі над жывёламі былі вымушаныя нанесці гіпс на нагу арлану-белахвосту. Пакуль, па словах ветэрынараў, ён пачуваецца добра.
«Праведзена складаная аперацыя, ён, здаецца, пачуваецца добра. Праз 3-4 дні будзем спрабаваць перавесці яго ў вялікую клетку, каб ён мог больш рухацца. Пералом быў старым, 1-2-тыднёвым, відаць бацькі кармілі пасля таго, як ён выпаў з гнязда», — сказала прадстаўнік асацыяцыі Юргіта Густайцене.
Тыдзень таму арнітолаг Саўлюс Румбуціс прывёз у памяшканне асацыяцыі птушаня арлана-белахвоста. Ён заўважыў яго, калі кальцаваў птушак у Сувалкіі. Птушаня знясілена ляжала не ў гняздзе, а на зямлі.
Падчас першаснага агляду высветлілася, што ў птушаняці пералом нагі.
Ветэрынар Густайцене склікала кансіліум, было вырашана пракансультавацца з вопытнымі ветэрынарамі-хірургамі і рабіць усё магчымае, каб выратаваць гэтую рэдкую птушку (арлан занесены ў Чырвоную кнігу Літвы). Птушку агледзеў і спецыялістаў кансультаваў дацэнт у галіне ветэрынарыі. Ён параіў зрабіць рэнтген і ўзяўся правесці складаную аперацыю.
Аперацыя, па словах прадстаўнікоў асацыяцыі, абышлася дорага.
Калі яна завершыцца поспехам (а арлан ўжо хапае кіпцюрамі здабычу —гэта відавочная прыкмета паляпшэння), птушку чакае доўгі перыяд догляду і рэабілітацыі.
Каментары