Пры выратаванні пілота ў Іране ЦРУ выкарыстала сакрэтны інструмент «Прывідны шэпт». Ён ловіць самыя слабыя сігналы чалавечага арганізма

Гэтая тэхналогія, як паведамляецца, выкарыстоўвае квантавую магнітаметрыю далёкага дзеяння для выяўлення электрамагнітнага адбітка сэрцабіцця чалавека і супастаўляе гэтыя даныя з праграмным забеспячэннем на аснове штучнага інтэлекту для выдзялення гэтага адбітка на фоне шуму.

Адзначаецца, што назва выбрана невыпадкова. Murmur — гэта медыцынскі тэрмін, які абазначае сардэчны рытм, а Ghost азначае пошук чалавека, які «па сутнасці знік», патлумачыў адзін з суразмоўцаў журналістаў. Пры гэтым невядома, ці мае прылада дадатковае наступальнае прымяненне ў ваенных умовах.

«Прывідны шэпт» быў прыменены ў палявых умовах упершыню. Як адзначае NYP, на гэта на брыфінгу намякнулі прэзідэнт ЗША Дональд Трамп і дырэктар ЦРУ Джон Рэткліф.

«Гэта як пачуць голас на стадыёне, толькі стадыён — гэта тысяча квадратных міляў пустыні. Пры адпаведных умовах, калі ваша сэрца б’ецца, мы вас знойдзем», — расказаў The New York Post суразмоўца, знаёмы з праграмай.

Паводле звестак NYP, прылада пад назвай Ghost Murmur была распрацавана ў сакрэтным падраздзяленні Skunk Works кампаніі Lockheed Martin, якая займаецца аэракасмічнымі і вайсковымі тэхналогіямі.

Сістэму ўжо выпрабавалі на верталётах Black Hawk, а ў будучыні яе могуць выкарыстоўваць і на знішчальніках F-35. Першыя выпрабаванні праводзіліся ў пустыннай мясцовасці Ірана, бо там амаль няма электрамагнітных перашкод, што стварае ідэальныя ўмовы для такіх тэхналогій.

Паведамляецца, што прылада здольная ўлоўліваць вельмі слабыя сігналы чалавечага арганізма — настолькі слабыя, што раней іх можна было зафіксаваць толькі ў лабараторных умовах. Але дзякуючы сучасным распрацоўкам, у прыватнасці квантавым магнітаметрам і спецыяльным датчыкам на аснове сінтэтычных алмазаў, стала магчымым выяўляць гэтыя сігналы на значнай адлегласці.

Гэтая тэхналогія сыграла ключавую ролю падчас аперацыі па пошуку збітага пілота: з яе дапамогай удалося прыкладна вызначыць яго месцазнаходжанне. Далей для дакладнага вызначэння выкарыстоўваўся аварыйны маяк, і разам гэтыя сістэмы дазволілі знайсці чалавека.

Прадстаўнікі ЗША адзначаюць, што ў аперацыі выкарыстоўваліся ўнікальныя тэхналогіі, якіх няма ў іншых спецслужбаў. Саму аперацыю параўноўваюць з пошукам адной пясчынкі ў пустыні.

Паводле заяваў Дональда Трампа, гэта была адна з самых смелых выратавальных аперацый у гісторыі ЗША. У ёй удзельнічалі дзясяткі самалётаў і спецыяльныя падраздзяленні, а сама аперацыя праводзілася з паветраным прыкрыццём.

• 11
• 0
• 1
• 2
• 2
• 0
• 0
• 0