Чалы: Санкцыі ЗША не распаўсюджваюцца на беларускія філіялы расійскіх банкаў
Кіраўніцтва ЗША ўхваліла новую хвалю санкцый супраць шэрагу расійскіх кампаній ваенна-прамысловага і нафтавага комплексу.
Пад дзеянні санкцый трапілі карпарацыя «Алмаз-Антэй» і канцэрн «Калашнікаў», а таксама НВА «Іжмаш», НВА «Базальт», «Уралвагонзавод» і КБ «Прыборабудаванне», «Новатэк», «Раснафта», Феадасійскае прадпрыемства па забеспячэнні нафтапрадуктамі (Крым), віцэ-спікер Дзярждумы Сяргей Нявераў, памочнік прэзідэнта Расіі Ігар Шчогалеў, міністар па справах Крыма Алег Савельеў, а таксама «прэм'ер» ДНР Аляксандр Барадай.
Але ці трапяць пад гэтыя санкцыі беларускія «Белгазпромбанк» і «Белзнешэканамбанк», якія належаць расійскім «Внешэканомбанку», «Газпромбанку», якія таксама трапілі ў чорны спіс ЗША?
Эканаміст Сяргей Чалы патлумачыў, што санкцыі ЗША не распаўсюджваюцца на беларускія філіялы расійскіх банкаў, бо яны зарэгістраваныя як беларускія юрыдычныя асобы:
«Санкцыі ЗША супраць Расіі могуць паўплываць на эканоміку Беларусі, але вельмі ўскосна. У Расіі эканамічная сітуацыя і так не была добрая, а праз санкцыі рэцэсія толькі ўзмацняецца. Праз гэта верагодна падзенне попыту на тавары, якія Беларусь эскпартуе ў Расію. Іншыя наступствы малаверагодныя, бо санкцыі накіраваныя ў асноўным на абмежаванне доступу да фінансавання для асобных кампаній і персанальныя санкцыі супраць пэўных асобаў».
Сяргей Чалы лічыць, што пашырэнне санкцый ЗША ў дачыненні да Расіі магчымы па «іранскім сцэнары»:
«Калі будуць новыя хвалі санкцый, то гаворка будзе ісці не пра кампаніі, а пра накірункі дзейнасці. Напрыклад, аб забароне супрацоўніцтва амераканскіх і расійскіх кампаній у нафтагазавай сферы, на перадачу тэхналогій. Напэўна, будуць сур'ёзныя дзеянні ў дачыненні да ўсяго банкаўскага сектара. Канчатковы прыклад такога падыхода — санкцыі ЗША супраць Ірана».
Паводле новых санкцый ЗША, расійскія кампаніі з чорнага спіса не змогуць атрымаць амерыканскія крэдыты на тэрмін большы за 90 дзён, але іншыя фінансавыя аперацыі закранутыя не будуць. Расійскія СМІ паведамляюць, што міжнародныя плацёжныя сістэмы VISA і MasterCard не будуць блакаваць карткі падсанкцыйных банкаў, бо санкцыі ЗША прадугледжваюць толькі амбежаванне доступу да рынку крэдытаў.
Цяпер чытаюць
Мама Бажэны Ярэміч, якая рыхтуе прыгажунь для Лукашэнкі, купіла элітны катэдж коштам $837 тысяч25
Каментары