Пагоня за п'яным дальнабоем ФОТЫ, ВІДЭА
Гродзенская Дзяржаўтаінспекцыя паведаміла падрабязнасці пераследу ўвечары 27 ліпеня п'янага кіроўцы фуры, якая перавозіла новыя машыны. Пагоня доўжылася ад Зэльвы аж да Баранавіч.
Як паведамляе ўпраўленне ДАІ УУС Гродзенскага аблвыканкама, у 20 гадзін у дзяжурную частку Зэльвенскага РАУС паступіла інфармацыя аб ДТЗ у раённым цэнтры. Кіроўца вялікагрузнага аўтамабіля на вуліцы Шасейнай пры выездзе са стаянкі пашкодзіў «Хундай», які стаяў, і з месца здарэння ўцёк. Праз 15 хвілін у міліцыю патэлефанаваў ўладальнік «Мерседэса», які паведаміў, што яго аўтамабіль, які знаходзіўся на ўзбочыне, непадалёк ад вёскі Ёлка Зэльвенскага раёна зачапіла «Сканія», якая праязджала міма.
Каля 21 гадзіны на 61-м кіламетры аўтадарогі Баранавічы - Гродна ў поле зроку супрацоўнікаў ДАІ трапіў седлавы цягач, які, магчыма, быў датычны да гэтых аварый. Інспектары паспрабавалі спыніць «Сканію», аднак яе кіроўца праігнараваў патрабаванні спыніцца і паспрабаваў схавацца.
Рухаючыся ў напрамку Мінска, кіроўца вялікагруза, выконваючы абгон, сутыкнуўся з «Фольксвагенам», які рухаўся ў спадарожным напрамку, і здзейсніў трэцяе ДТЗ.
Не звяртаючы ўвагі на неаднаразовыя патрабаванні супрацоўнікаў ДАІ спыніцца, «Сканія» працягнула рух. Віляла з боку ў бок, ігнаравала знакі і дарожную разметку. Інспектары прынялі рашэнне ўжыць табельную зброю.
Па фуры было выпушчана 80 патронаў, але яна працягвала рух. Толькі калі кулямі быў шмат разоў прабіты бак і выцекла паліва, машына спынілася. На 183-м кіламетры аўтадарогі Брэст — Мінск кіроўцу затрымалі.
Ім аказаўся 30-гадовы жыхар сталіцы, які быў у стане алкагольнага ап'янення. Па выніках медыцынскага агляду, праведзенага ў Слонімскай раённай бальніцы, канцэнтрацыя пароў этылавага спірту ў выдыханым паветры кіроўцы склала 1,94 праміле.
Даючы тлумачэнні, ён сказаў, што выпіў гарэлкі, бо стаміўся ў дарозе і хацеў расслабіцца.
На кіроўцу надзелі наручнікі і даставілі ў Слонімскі РАУС.
«Сумны горад, пра які прынята добра казаць». Расіянка раскрытыкавала Мінск — беларусы ёй іранічна падзякавалі26
Каментары