Расійская дзяржаўная нафтавая кампанія «Роснефть» заключыла пагадненні з нарвежскай і швейцарскай кампаніямі. Такім чынам яна абышла санкцыі ЕС, якія забараняюць пастаўкі тэхналогій і абсталявання для глыбакаводнай здабычы нафты, у тым ліку на Арктычным шэльфе.
У пачатку жніўня 2014 «Роснефть» купіла долю ў адной з найбуйнейшых у свеце нафтасервісных кампаній-падрадчыкаў — швейцарскай Weatherford, паведамілі ў прэс-службе кампаніі.
Паводле дамовы, расійскі бок атрымаў восем структурных падраздзяленняў, якія займаюцца бурэннем і рамонтам свідравін у Расіі і Венесуэле.
Бакі таксама дамовіліся аб доўгатэрміновым супрацоўніцтве ў галіне нафтасервісных паслуг. Сума ўгоды не называецца. Аднак, як стала вядома з рашэння Рады дырэктараў расійскай кампаніі ад 28 ліпеня, «Роснефть» заплаціла не больш за $ 398,3 млн за швейцарскія актывы.
«Роснефть» таксама падпісала доўгатэрміновае пагадненне па бурэнні марскіх свідравін з нарвежскай кампаніяй North Atlantic Drilling Ltd. Пагадненне ўключае ў сябе выкарыстанне да 2022 года шасці марскіх буравых установак для здабычы на шэльфе, у тым ліку ва ўмовах Арктыкі.
На мінулым тыдні Еўрапейскі Саюз забараніў пастаўкі тэхналогій для глыбакаводнага бурэння нафтавых свідравін у Расію, праз што вялікія праекты «Роснефті» на шэльфе апынуліся пад пагрозай.
Аднак кантракты з нарвежскай і швейцарскай кампаніямі дазволяць Расеі абысці гэтыя абмежаванні.
Трэба адзначыць, што Нарвегія, як правіла, уводзіць санкцыі сіметрычна з ЕС, тады як Швейцарыя дэкларавала, што не будзе далучацца да сектаральных эканамічных санкцый. А таксама што ў выпадку сістэмных парушэнняў праз пасярэдніка ЕС тэарэтычна можа змяніць умовы санкцый такім чынам, каб спыніць дадзены канал пастаўкі ў РФ забароненага абсталявання.
Каментары