16 снежня а 19:00 запрашаем на адкрыццё фотавыставы «Від з акна».
Фотавыстава «Від з акна» уяўляе сабой экспазіцыю фатаграфій, знятых з аднаго пункту гарадской прасторы — з вокнаў вуглавога пакоя, што глядзяць на вуліцу Леніна і Нацыянальны мастацкі музей. Аўтарка назірала за зменамі наваколля і падзеямі пад яе вокнамі на працягу аднаго года. Куратарка выставы Алена Шаліма.
Фатограф Уладзімір Парфянок пракаментаваў выставу наступным чынам:
«Від з акна» Джозэфа Нісефора Ньепса, які датуецца 1827 годам, — ці не самая першая фотагенная выява, што ўвайшла ў гісторыю фатаграфіі задоўга да афіцыйнага паведамлення пра яе адкрыццё ў 1839 годзе. З тых часоў амаль кожны ўладальнік фотакамеры — ведаючы альбо зусім не ўсведамляючы пра існаванне гэтага хрэстаматыйнага здымка з няяснымі абрысамі, — хаця б раз у сваім жыцці рабіў здымак віду са свайго вакна. Такая ўжо прырода ў фотааматарства — інтуітыўна рухацца з камерай уздоўж за сваім цікаўным позіркам.
Калі для Ньепса ягоны «від з акна» быў усяго толькі неабходнай спробай адпрацоўкі тэхналагічнага працэса некалькігадзіннай экспазіцыі, то для сучасных фатографаў і фотамастакоў здымкі відаў з акна — працэс перад усім творчы. Знаходзячыся ў своеасаблівым сховішчы і застаючыся амаль незаўважаным для мінакоў, у фатографа ёсць магчымасць зафіксаваць зменлівыя вобразы па той бок шкла, пераўтвараючы сам працэс здымкаў у канцэптуальную акцыю назірання за вонкавым светам і ягоным укладам. І Аляксанда Баярына прапануе нам свой варыянт карціны свету, які распавядае не толькі пра рэчаіснасць, убачаную праз акно ўласнай кватэры, але і пра асабісты нутраны сусвет самой аўтаркі…»
Мінск, кінатэатр «Перамога», вул. Інтэрнацыянальная, 20.
Часы працы: панядзелак – нядзеля, 12:00 – 22:00.
Каментары