У пяцізоркавым гатэлі хлопчык выпаў з акна і загінуў. Бацьку аштрафавалі на тры тысячы еўра

Бацьку, двухгадовы сын якога выпаў з акна чацвёртага паверха гатэля на Кіпры, аштрафавалі на 3000 еўра. Хлопчык загінуў, піша Бі-бі-сі — Украіна.

Як паведаміў акруговы суд Пафаса, Джошуа Фостэр думаў, што акно зачыненае, і пасадзіў сына на падаконнік. Ён хацеў паказаць яму від на аквапарк, але страціў над ім кантроль.

Гэта быў першы дзень сямейнага адпачынку — 12 ліпеня. Дзіця ўпала з вышыні амаль 12 метраў у пяцізоркавым гатэлі King Evelthon Beach Hotel and Resort у Хларакасе.

37‑гадовы Фостэр з Вялікабрытаніі прызнаў сябе вінаватым у прычыненні смерці сына праз неасцярожнасць.

Пасля гэтага ён сказаў журналістам: «Дзякуй за падтрымку. Я з нецярпеннем чакаю вяртання дадому і магчымасці быць з жонкай і дачкой».

За некалькі гадзін да трагедыі Джошуа Фостэр разам з жонкай, двума дзецьмі, цесцем і цешчай прыляцеў на Кіпр. Яны купаліся, актыўна бавілі час, а ўвечары рыхтаваліся пайсці на вячэру.

Жыццё, якое «змянілася назаўжды»

Паводле слоў адваката Аляксандраса Аляксандру, каля 18:00 Фостэр ішоў да ліфта разам з цесцем і сынам і гуляў з дзіцем.

У судзе расказалі, што па дарозе хлопчык заўважыў аквапарк за межамі будынка.

Фостэр націснуў кнопку ліфта, пасадзіў дзіця на падаконнік, і здарылася неймавернае, перш чым ён паспеў зрэагаваць.

На папярэднім слуханні, якое адбылося 6 кастрычніка, Александру заявіў, што з таго моманту жыццё Фостэра змянілася назаўжды.

Хлопчыка даставілі ў бальніцу Пафаса, дзе пазней канстатавалі яго смерць.

Фостэр расказаў паліцыі, што, калі ён пасадзіў сына на падаконнік, той упаў «раней, чым ён паспеў яго схапіць».

Хоць у арганізме Фостэра выявілі алкаголь, гэта не стала ключавым элементам абвінавачання. Яго адвакат падкрэсліў, што ніхто не сведчыў пра тое, што мужчына быў п'яны.

Адвакат таксама расказаў, што Фостэр правёў пад вартай восем дзён. З ізалятара ён быў вымушаны патэлефанаваць дачцэ і растлумачыць, што здарылася.

У судзе таксама паведамілі, што акно мела 2,85 метра ў шырыню і 1,2 метра ў вышыню.

У заяве каля суда Аляксандрас Аляксандру назваў свайго кліента «неверагодным бацькам».

«Ён узорны сем'янін, у якога цудоўная сям'я. Яна падтрымлівае яго, атуляе клопатам і заўсёды застаецца на яго баку».

Адвакат дадаў, што пасля абвяшчэння прысуду Фостэр вельмі цяжка яго перажываў, а яго сям'і патрэбны час, каб аплакваць страту.

«Увесь гэты час яны былі засяроджаныя на абароне», — сказаў Аляксандру.

• 0
• 0
• 0
• 1
• 1
• 5
• 0
• 0