Неабходнасці ў прывязцы кошту беларускага рубля да расійскага рубля ў фінансавых улад Беларусі няма. Такую думку выказаў былы старшыня праўлення Нацыянальнага банка Станіслаў Багданкевіч, аналізуючы зацверджаны галоўным банкам краіны комплекс мер «па далейшай стабілізацыі сітуацыі ў фінансавай сферы і аднаўленні ўстойлівасці функцыянавання валютнага рынку».
Сярод іншых мер, 9 студзеня Нацбанк аднаўляе выкарыстанне механізму прывязкі курсу беларускага рубля да кошыка замежных валют. Пры гэтым у структуры кошыка доля расійскага рубля павялічваецца да 40%, а долі еўра і долара ЗША зніжаюцца да 30% кожная.
«Разлікі з Расіяй у нас усё роўна ідуць у доларавай ацэнцы. Кантракты заключаюцца на пастаўку нафты, газу і іншых тавараў у доларах ЗША. Таму ніякай неабходнасці прывязвацца да расійскага рубля няма», — мяркуе Багданкевіч.
Ён таксама нагадаў, што нядаўна самі беларускія ўлады настаялі на тым, каб фіксаваць цэны пры экспарце харчавання ў Расію ў доларах.
«Варта таксама ўлічваць, што курс расійскага рубля адштурхоўваецца ад кошту долара ЗША. Зыходзячы з усяго гэтага не зусім зразумелае рашэнне беларускага Нацбанка ў частцы «прывязкі» да расійскага рубля», — зазначыў эксперт.
У цэлым, на думку Багданкевіча, папярэдні вопыт прывязкі да кошыка валют не даў нічога станоўчага. «Гэта, вядома, не так прынцыпова, але мне здаецца, што было б намнога прасцей, калі б курс беларускага рубля быў «прывязаны» да долара ЗША», — сказаў Багданкевіч.
Экс-кіраўнік Нацбанка таксама мяркуе, што стаўка рэфінансавання, якую 9 студзеня Нацбанк павышае на 5 працэнтных пунктаў да 25% гадавых, па-ранейшаму не адпавядае эканамічным рэаліям і адыгрывае «віртуальную ролю». «Стаўка названая, але на яе ніхто ўвагі ўжо не звяртае», — зазначыў эксперт.
«Разумна было павышаць да ўзроўню максімальных ставак па дэпазітах. Стаўка рэфінансавання — гэта стаўка, па якой даюцца рэсурсы Нацыянальным банкам камерцыйным банкам. І калі сёння рэсурсы даюцца пад 50%, а заўтра будуць пад 40%, то чаму стаўка павінна быць 25%? Некаторае збліжэнне ставак ідзе. Але чаму б не абрэзаць гэта ўсё аднамомантна і больш не дапускаць гэтых жартаў?» — задаўся пытаннем экс-кіраўнік Нацбанка.
У цэлым, на яго думку, прынятыя Нацбанкам меры зроблены ў правільным кірунку, аднак неабходна ўзгодненая з урадам рэальная праграма дзеянняў, структурных рэформ у эканоміцы, якая магла б быць падтрыманая ў тым ліку Міжнародным валютным фондам і Еўразійскім банкам развіцця. У гэтым выпадку Беларусь магла б атрымаць такія неабходныя знешнія запазычванні. «Такой эканамічнай праграмы пакуль, на жаль, няма», — падкрэсліў Багданкевіч.
Каментары