Прыватныя кампаніі на тэрыторыі Расійскай Федэрацыі абавязваюць мяняць беларускія назвы.
У Расіі створаны прэцэдэнт па накладанні забароны на выкарыстанне ў назвах прадпрыемстваў слоў, вытворных ад назвы нашай краіны: Беларусь.
Арбітражны суд Краснаярскай вобласці абавязаў мясцовых бізнесменаў прыбраць з назваў двух кампаній словы «Белоруссия» і «Белорусский».
Пад суд трапілі прадпрыемствы «Продукт Белоруссии» і «Торговый дом «Белорусский». Іх уладальнікаў абавязалі перарэгістраваць бізнес, але ўжо без згадкі Беларусі.
Абодва пазовы ў арбітраж падала інспекцыя Федэральнай падатковай службы (ІФПС) па Краснаярскім краі.
Падатковыя органы спаслаліся на артыкул 1473 Грамадзянскага кодэкса Расійскай Федэрацыі, якая забараняе выкарыстоўваць у фірменнай назве юрыдычнай асобы поўныя або скарочаныя афіцыйныя назвы замежных дзяржаў, а таксама вытворныя словы.
Характэрна, што гэтая забарона ў Расіі была уведзеная з 1 студзеня 2008 года.
Тым не менш, улады Краснаярскага краю зарэгістравалі ў чэрвені 2011 года ТАА «Торговый дом «Белорусский», а ў маі 2013 — ТАА «Продукт Белоруссии». Рэгістрацыйныя пасведчанні выдавала тая ж міжраённая ІФПС па Краснаярскім краі, якая цяпер раптам заўважыла парушэнні закона ў назвах згаданых фірмаў і ініцыявала судовы працэс.
На думку экспертаў, уладальнікі «Торгового дома «Белорусский» і ТАА «Продукт Белоруссии» пры жаданні маглі б адстаяць гэтыя назвы. У першым выпадку, варта было б паспрабаваць даказаць, што «Белорусский» мае непасрэдныя адносіны да нацыі, а не вытворнае ад назвы дзяржавы. Яшчэ прасцейшая задача ў ТАА «Продукты Белоруссии», паколькі такой краіны няма, афіцыйная назва нашай дзяржавы Рэспубліка Беларусь.
Створаны Арбітражным судом Краснаярскай вобласці прэцэдэнт можа выклікаць аналагічныя працэсы і ў іншых рэгіёнах Расіі. У Расіі цяпер працуе некалькі дзесяткаў кампаній, у назвах якіх ёсць словы «Беларусь», «Белорусский».
Дарэчы, у Беларусі актыўна рэгіструюцца і развіваюцца кампаніі, у якіх выкарыстоўваюцца «рускія» назвы. Да прыкладу, на нашым рынку працуе «Русская тракторная компания», ёсць ТАА «Русские масла», ТАА «Компания «Русский лес». Адзін з найбуйнейшых прадаўцоў імпартных кандытарскіх вырабаў на тэрыторыі нашай краіны: Кіравальнае ТАА «Русские сладости». Прычым, менавіта «Русские сладости» таксама з'яўляюцца галоўным пастаўшчыком ў Беларусь прадукцыі пад украінскім брэндам Roshen.
Цяпер чытаюць
22‑гадовы Віктар з-пад Клецка пратрымаўся на фронце месяц. А пасля бацькі перасварыліся, дзелячы грабавыя10
Каментары