Фота: onkami via DeviantArt
Чыгуначны суд Гомеля вынес вердыкт па крымінальнай справе, якую назвалі «справай панка», распавядае sb.by.
Два нецвярозыя мужчыны 32 і 33 гадоў нажом адрэзалі валасы 23-гадоваму хлопцу са словамі: «Ты што ходзіш патлы распусціўшы».
Адзін з нападнікаў працаваў на заводзе «Гомсельмаш», другі на той момант быў беспрацоўным. На вуліцы яны спынілі пацярпелага, схапілі яго за завязаныя ў хвосцік валасы, хацелі яго збіць.
Адзін з нападнікаў прапанаваў адрэзаць валасы, што і было зроблена. «На развітанне» адзін з нападнікаў ударыў пацярпелага ў твар.
Пацярпелы запатрабаваў кампенсацыю маральнай шкоды памерам 2 млн рублёў. Яе да завяршэння працэсу выплацілі родныя нападнікаў.
За здзяйсненне асабліва злоснага хуліганства нападнікі атрымалі па тры гады пазбаўлення волі ў калоніі ўзмоцненага рэжыму.
Прысуд пакуль не набыў сілу і можа быць абскарджаны.