МУС Украіны абвясціў батальён «Тарнада» па-за законам: база аточана, камандзір арыштаваны
Ва Украіне набірае абароты скандал з батальёнам міліцыі «Тарнада», у якім ваюе беларус «Маджахед». МУС Украіны абвінаваціла кіраўніцтва батальёна ў стварэнні злачыннай групоўкі, на што «тарнадаўцы» забарыкадаваліся ў школе і пагражаюць страляць па міліцыянтах.
Паводле ўкраінскіх праваахоўцаў, кіраўнік атрада міліцыі спецпрызначэння «Тарнада» Анішчанка разам з некаторымі паплечнікамі займаўся катаваннем і выкраданнем людзей.
Акрамя таго, адзін з пацярпелых абвінавачвае службоўцаў у калектыўным сэксуальным гвалце, які «тарнадаўцы» яшчэ і здымалі на відэа.
Праз гэтыя ды іншыя эпізоды галоўны ваенны пракурор Украіны Анатоль Маціёс загадаў расфармаваць батальён, але ў адказ батальён «Тарнада» забарыкадаваўся ў будынку Севераданецкай школы, дзе месціцца іхняя база.
«У дадзены момант там знаходзіцца 170 чалавек, 100 з якіх афіцыйна з’яўляюцца міліцыянтамі. Яшчэ 70 – узброеныя невядома хто. На базе вялізарная колькасць зброі і баяпрыпасаў. Супрацоўнікі міліцыі з «Тарнада» замінавалі падыходы да школы і паставілі баявыя пункты, усталявалі гранатамёты, прапускаць следчых для вобшуку яны адмаўляюцца», — сказаў у інтэрв’ю «Украінскай праўдзе» Анатоль Маціёс і адзначыў, што значная колькасць чальцоў «Тарнада» — неаднаразова асуджаныя рэцэдывісты.
І следству таксама належыць разабрацца, якім чынам гэтыя людзі патрапілі ў шэрагі МУС і атрымалі зброю.
У самім жа «Тарнада» абвяргаюць абвінавачанні і абяцаюць адкрыць агонь па калегах, калі тыя паспрабуюць пранікнуць на базу.
У батальёне ваюе беларус «Маджахед», які раней быў ранены на фронце і вызнае іслам.
Каментары