Сёння ў Брэсце супрацоўнікам АУС Ленінскага раёна затрыманая актывістка Аб'яднанай грамадзянскай партыі Аліна Літвінчук, якая везла з Мінска пасведчанні членаў ініцыятыўнай групы Анатоля Лябедзькі, што пражываюць у Брэсцкім рэгіёне.
Як паведаміў БелаПАН Лябедзька, Літвінчук знаходзіцца ў міліцыі. «На яе складаюць пратакол, быццам бы фігуруюць два артыкулы», — сказаў палітык. Затрыманне актывісткі ён назваў «кропкавым»: «Яе чакалі».
Як лічыць прэтэндэнт у прэзідэнты, у Брэсце «адбылася адкрытая правакацыя». «Калі браць яе прававы бок, то мы фактычна не можам збіраць у Брэсцкай вобласці подпісы, бо ў людзей няма пасведчанняў», — сказаў Лябедзька.
Паводле яго слоў, ЦВК ужо праінфармаваная пра здарэнне. Палітык не выключыў магчымасць звароту са скаргай у пракуратуру. «Лічу, што гэтае здарэнне — спроба ўнесці вірус страху ў нашу каманду», — заявіў Лябедзька.
Цяпер прэтэндэнт у прэзідэнты ўдзельнічае ў пікеце каля мінскага ГУМа, падчас якога заклікае людзей «зрабіць самае простае — паставіць свае подпісы за перамены ў краіне».
Цяпер чытаюць
Ці варта купляць закінутую хату за адну базавую і колькі гэта каштуе насамрэч? Вось што расказваюць людзі1
Каментары