Цэнтрвыбаркам адмовіўся выдзеліць дадатковы эфірны час кандыдату ў прэзідэнты Таццяне Караткевіч.
Караткевіч прасіла ЦВК даць ёй эфірны час, не выкарыстаны кандыдатам у прэзідэнты Аляксандрам Лукашэнкам, на падставе заявы, якую ён зрабіў 25 верасня. Наведваючы ў той дзень Беларускі металургічны завод, кіраўнік дзяржавы сказаў, што можа «падарыць» свой нявыкарыстаны эфірны час, «калі камусьці трэба». «Але, самае цікавае, яны не хочуць больш», — дадаў ён, кажучы аб іншых кандыдатах.
«Пасля двух выступленняў на ТБ Таццяны Караткевіч былі шматлікія звароты грамадзян з просьбай выступіць яшчэ і расказаць пра розныя праблемы, якія ёсць сёння ў Беларусі, і прапанаваць шляхі іх вырашэння», — гаворыцца ў звароце Караткевіч у ЦВК.
На сённяшнім пасяджэнні сакратар ЦВК Мікалай Лазавік адзначыў, што фармальных падстаў для разгляду пытання не хапае, бо няма афіцыйнай заявы Аляксандра Лукашэнкі аб тым, што ён аддае свой эфірны час. «Нават калі б мы хацелі камусьці перадаць эфірны час, мы б не змаглі гэта зрабіць у адпаведнасці з заканадаўствам. Эфірны час належыць не Цэнтрвыбаркаму, а Белтэлерадыёкампаніі», — сказаў Лазавік.
Ён таксама адзначыў, што ў адпаведнасці з заканадаўствам нявыкарыстаны час не падлягае аднаўленню, а перадача часу стварыла б розныя магчымасці для кандыдатаў.
Таксама Цэнтрвыбаркам адмовіў у задавальненні і другой скаргі Таццяны Караткевіч з патрабаваннем вынесці папярэджанне іншаму кандыдату — Аляксандру Лукашэнку.
Скарга тычыцца звароту да арміі Афіцэрскага сходу Узброеных сіл Беларусі. Дэлегаты 5-га Афіцэрскага сходу Узброеных сіл, які прайшоў 25 верасня ў Мінску, прынялі зварот да ўсіх ваеннаслужачых і членаў іх сем'яў з заклікам «выказаць усялякую падтрымку на выбарах галоўнакамандуючаму Узброенымі сіламі прэзідэнту Рэспублікі Беларусь А.Р.Лукашэнку».
Караткевіч лічыць, што такім чынам Лукашэнка, як галоўнакамандуючы, выкарыстаў адміністрацыйны рэсурс для ўласнай падтрымкі.
Прадстаўнік Міністэрства абароны на пасяджэнні ЦВК растлумачыў, што Афіцэрскі сход з'яўляецца адным з мерапрыемстваў падрыхтоўкі Узброеных сіл, якое зацвярджаецца не прэзідэнтам, а міністрам абароны.
Па-другое, адзначыў ён, пытанне звароту ў парадак дня не ўключалася, да яго не маюць дачынення ні Лукашэнка, ні яго каманда. Пры гэтым ён падкрэсліў, што афіцэры маюць роўныя правы з іншымі грамадзянамі Беларусі, і ім не могуць адмовіць у праве выказваць сваё меркаванне.
Сакратар Цэнтрвыбаркама Мікалай Лазавік звярнуў увагу на тое, што прыняцце звароту было ініцыятывай сходу, пры гэтым да яе не мае ніякага дачынення каманда Лукашэнкі.
Цэнтральная камісія адмовіла ў задавальненні скаргі аднагалосна.
Каментары