Следства па справе краснагорскага бізнэсмэна Амірана Геаргадзэ, які абвінавачваецца ў забойстве чатырох чалавек, мяркуе, што ён мог мець дачыненне і да іншых цяжкіх злачынстваў. Следчыя падымаюць матэрыялы шэрагу старых крымінальных спраў, заведзеных па факце злачынстваў, якія былі звязаны з перадзелам сфераў уплыву. Аб гэтым піша газета «Известия».
У прыватнасці, правяраецца дачыненне Геаргадзэ да забойства ўладальніка аўтасэрвісу Ігара Шрамчанкі, злодзея ў законе Давіда Мелкадзэ (Дато Паційскага), а таксама да гібелі ў 2013 годзе пры таямнічых абставінах у ДТЗ у Беларусі першага намесніка Краснагорска Сяргея Пятрова, галоўнага архітэктара горада Маргарыты Фальковай і мясцовага дэпутата Аляксандра Старчанкі.
Шрамчанка быў зарэзаны ў сакавіку 2015 ў двары дома ў Краснагорску. Перад смерцю ён паспеў сказаць жонцы, што ведае забойцу, але імя назваць не паспеў. Злачынцы дагэтуль не знойдзеныя. Па дадзеных следства, людзі, нібыта звязаныя з Геаргадзэ і кіраўніком «Краснагорскіх электрычных сетак» Георгіем Катлярэнкам. пераконвалі яго перадаць ім долю ў прадпрыемстве. Падача ў аўтасэрвіс электраэнергіі і вады была адключаная, а чыноўнікі адмовіліся выдаваць дазвол на ўвод у эксплуатацыю. Шрамчанка абскардзіў адмову, выйграў справу, пасля чаго і быў забіты.
Мелкадзэ быў расстраляны ў студзені 2014 на паркоўцы ў «Леруа Мерлен». Як лічаць у праваахоўных органах, Дато Паційскі мог дапамагаць Геаргадзэ вырашаць розныя пытанні, і не выключана, што паміж імі маглі паўстаць рознагалоссі. У чэрвені 2015-га па гэтай справе быў асуджаны на 12 гадоў калоніі ўраджэнец Арменіі Бахшы Петрасян. Па версіі следства, ён забіў злодзея ў законе па матывах асабістай непрыязнасці.
Улетку 2013 года ў Беларусі ў ДТЗ загінулі адразу тры чыноўнікі Краснагорска, а таксама іх кіроўца Ісрафіл Асманаў. Яны вярталіся з Карэлічаў, горада-пабраціма Краснагорска, калі іх Renault Duster раптам страціў кіраванне і ўрэзаўся ў аўтацягнік, які стаяў на ўзбочыне. Кіраўнік раёна Барыс Расказаў павінен быў узначаліць дэлегацыю, аднак у апошні момант яго выклікалі ў абласны ўрад.
Каля 2 гадзін ночы 5 ліпеня на 423-м км трасы М1, паблізу вёскі Заручча Барысаўскага раёна, Renault Duster пад кіраваннем 50-гадовага вадзіцеля ўрэзаўся ў грузавы аўтамабіль DAF з паўпрычэпам. У выніку аварыі загінулі ўсе, хто быў у Renault: кіроўца і пасажыры — 65-гадовы і 54-гадовы мужчыны і 57-гадовая жанчына. Усе — грамадзяне РФ.
Варыянт тэхнічнай няспраўнасці аўтамабіля малаверагодны: Renault быў зусім новы — усяго месяц таму пастаўлены на першы ўлік.
Расійскія следчыя не выключаюць, што аўтамабіль меў няспраўнасць і ДТЗ было падстроена. Магчыма, што ў чыноўнікаў мог паўстаць канфлікт з Геаргадзэ па пытаннях размеркавання участкаў і ўзгаднення праектаў — альбо іх маглі ліквідаваць як удзельнікаў і сведак ценявых схемаў.
***
Па дадзеных следства, 19 кастрычніка 2015 г. Аміран Геаргадзэ застрэліў на працоўным месцы першага намесніка кіраўніка Краснагорскага раёна Юрыя Караўлава і кіраўніка мясцовай электрасеткі Катлярэнку. Як мяркуецца, бізнэсмэн таксама планаваў замах на Рассказава, але ён быў прадухілены.
Збягаючы ад паліцэйскіх, абвінавачаны расстраляў пенсіянера, супрацоўніка службы бяспекі газеты «Маскоўскі камсамолец». Пазней у ходзе ператрусу кватэры прадпрымальніка следчыя выявілі цела чацвёртага забітага — Трэстана Закаідзэ, партнёра Геаргадзэ па будаўнічым бізнесе.
Кіроўца Геаргадзэ, Шата Элізбарашвілі, здаўся паліцыі. Паводле яго слоў, ён суправаджаў бізнесмена да моманту забойства выпадковага мінака, пасля чаго «спалохаўся і вырашыў добраахвотна прыйсці ў праваахоўныя органы». Следчы камітэт прад'явіў Элізбарашвілі абвінавачванне ў дапамаганні забойства.
Цяпер чытаюць
У міліцэйскім конкурсе прыгажосці перамагла амапаўка, якая ў 2020 годе разганяла пратэсты44
Каментары