У Мінэканомікі адбылася сустрэча з дэлегацыяй Еўрасаюза

Першы намеснік міністра эканомікі Аляксандр Забароўскі 10 снежня сустрэўся з дэлегацыяй ЕС на чале з намеснікам кіраўніцкага дырэктара па пытаннях Еўропы і Сярэдняй Азіі Гунарам Вігандам і намеснікам гендырэктара генеральнага дырэктарата па палітыцы суседства і перамовах аб пашырэнні Катарынай Мацернавай. У сустрэчы таксама брала ўдзел кіраўнік прадстаўніцтва ЕС у Беларусі Андрэа Віктарын.

«Падчас сустрэчы Аляксандр Забароўскі выказаў надзею, што ў адносінах Беларусі з ЕС прыярытэтным будзе эканамічны кірунак, што праявіцца ў рэальных практычных выніках супрацоўніцтва. Прадстаўнікі Еўракамісіі пацвердзілі гатоўнасць далейшай сумеснай працы па падтрымцы эканамічных пераўтварэнняў у Беларусі, у тым ліку ў плане пашырэння доступу Беларусі да лепшых практык Еўрасаюза», — паведаміла прэс-служба Мінэканомікі.

Віганд нагадаў, што Еўрасаюз плануе павялічыць аб'ём фінансавай дапамогі для нашай краіны на 2016 год, «што будзе садзейнічаць павышэнню канкурэнтаздольнасці беларускага рынку і адкрые новыя магчымасці для развіцця эканомікі».

Бакі абмеркавалі магчымасці пашырэння інвестыцыйнага, гандлёвага і фінансавага супрацоўніцтва, узаемадзеяння, накіраванага на развіццё малога і сярэдняга бізнесу, і дамовіліся інтэнсіфікаваць дыялог па ўсіх гэтых кірунках. «Было заяўлена аб неабходнасці стварэння рабочай групы, у межах якой будзе працягнута камунікацыя па ўсіх акрэсленых пытаннях», — зазначылі ў міністэрстве.

Падчас сустрэчы таксама абмяркоўвалася магчымасць садзейнічання з боку Еўрапейскага саюза ва ўступленні Беларусі ў Сусветную гандлёвую арганізацыю.

Апрача таго, размова ішла аб магчымасцях дадатковага крэдытавання Беларусі з боку міжнародных фінансавых інстытутаў: Еўрапейскага банка рэканструкцыі і развіцця, Еўрапейскага інвестыцыйнага банка, Сусветнага банка і Міжнароднага валютнага фонду.

Дэлегацыя Еўрапейскай службы знешніх дзеянняў і генеральнага дырэктарата Еўрапейскай камісіі па палітыцы суседства і перамовах аб пашырэнні знаходзілася ў Мінску з рабочым візітам 9—10 снежня. Падчас сустрэчы з журналістамі Віганд паведаміў, што ЕС падвоіць аб'ём фінансавай дапамогі краіне. «Мы падвоім аб'ём фінансавай дапамогі на наступны год, які будзе накіраваны на шэраг праграм, мэта якіх дапамагчы Беларусі атрымаць дадатковую канкурэнтаздольнасць і новыя магчымасці ў развіцці эканомікі і ў рэгіянальным развіцці», — сказаў ён.

• 0
• 0
• 0
• 0
• 0
• 0
• 0
• 0