Рэцэсія ў Беларусі ў наступным годзе захаваецца. У 2016 годзе ВУП Беларусі знізіцца на 1%, а сёлета эканамічны спад складзе 3,7%. Такія ацэнкі прыводзяцца ў снежаньскім макраэканамічным аглядзе, які падрыхтаваў Даследчы цэнтр ІПМ.
Нагадаем, згодна з афіцыйнымі звесткамі за студзень—кастрычнік, ВУП Беларусі знізіўся на 3,9% у параўнанні з аналагічным перыядам 2014 года. Працяг рэцэсіі ў беларускай эканоміцы ў 2016 годзе вельмі верагодны з улікам дэпрэсіўнага стану інвестыцыйнага попыту ў краіне, лічаць эксперты.
Прыгнечаны інвестыцыйны попыт, паводле іх прагнозаў, будзе, з аднаго боку, абумоўлены тым, што прадпрыемствы з прычыны нізкага попыту на прадукцыю не змогуць задзейнічаць нават наяўныя магутнасці, сфарміраваныя ў многіх выпадках за перыяд мадэрнізацыі ў 2012—2014 гадах. «Рэальны сектар чакае дастаткова нізкую аддачу на інвестыцыі, прымаючы да ўвагі слабы патэнцыял росту, няпэўнасць, а таксама (у шэрагу выпадкаў) лішак накопленага капіталу ў папярэднія перыяды», — гаворыцца ў макраэканамічным прагнозе.
З іншага боку, нізкая інвестыцыйная актыўнасць у краіне захаваецца ў 2016 годзе з прычыны высокага кошту крэдытных рэсурсаў, адзначаюць эканамісты Даследчага цэнтра ІПМ. «Фактычна рэальныя стаўкі грашовага рынку застаюцца на надзвычай высокім узроўні за кошт высокіх інфляцыйных чаканняў, якія адлюстроўваюць нізкі давер да эканамічнай палітыкі, якая праводзіцца», — гаворыцца ў дакуменце.
Такім чынам, улічваючы прыгнечаны стан інвестыцыйнай актыўнасці, эканамічны спад у Беларусі ў наступным годзе захаваецца. «Працяглая рэцэсія непазбежна будзе прыводзіць да зніжэння занятасці і росту беспрацоўя. Падобны сцэнарый ужо пачаў рэалізоўвацца ў 2015 годзе, і мы разглядаем яго ў якасці найбольш верагоднага для 2016 года», — адзначаюць эканамісты Даследчага цэнтра ІПМ.
Захаванне рэцэсіі, прагназуюць яны, будзе параджаць імкненне беларускіх уладаў «даць дадатковыя стымулы для яе хутчэйшага пераадолення». «Аднак на сёння абмежаванні для эканамічнай палітыкі бачацца настолькі жорсткімі, што мы зыходзім з таго, што ўрад не зможа рэалізаваць гэтае імкненне», — гаворыцца ў аглядзе.
Пры гэтым яго аўтары папярэджваюць, што штучнае стымуляванне эканомікі можа стварыць пагрозы для фінансавай стабільнасці.
Цяпер чытаюць
Мінчанка Ангеліна, якая прасіла ў Лукашэнкі кватэру за тройню, атрымала жыллё17
Мінчанка Ангеліна, якая прасіла ў Лукашэнкі кватэру за тройню, атрымала жыллё
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»1111
Каментары