На працягу 2016-2017 гадоў беларускае войска атрымае сучасную ракетную тэхніку і больш сучасныя ракетныя комплексы. Гэта адбудзецца ў мэтах выканання даручэнняў кіраўніка дзяржавы па стварэнні айчыннага ракетабудавання, паведаміў міністр абароны генерал-лейтэнант Андрэй Раўкоў у інтэрв'ю праграме «Арсенал» тэлекампаніі «ВаенТБ».
Паводле яго слоў, «цяпер адзначаецца станоўчая дынаміка ў вырашэнні пытання аб прыняцці на ўзбраенне новай рэактыўнай сістэмы залпавага агню «Паланэз» (яна страляе на 200 км).
Міністр абароны заявіў, што «адной з прыярытэтных задач развіцця Узброеных сілаў з'яўляецца павышэнне якасных характарыстык ўзораў ваеннай тэхнікі, што стаіць на ўзбраенні». Гэта і мадэрнізацыя наяўных узораў ваеннай і спецыяльнай тэхнікі, так і закупка новай, «больш дасканалай».
Паводле слоў Раўкова, за апошнія пяць гадоў ВПС і войскамі СПА праведзена і працягваецца вялікая праца, вынікам якой ужо сталі закупка і прыняцце на ўзбраенне сучаснага зенітнага ракетнага комплексу «Тор-М2» у складзе дывізіёна, закупка найноўшых самалётаў Як-130, а таксама закупка чатырох зенітных ракетных дывізіёнаў С-300ПС у межах ваенна-тэхнічнага супрацоўніцтва з Расіяй.
У найбліжэйшай перспектыве — абнаўленне парка авіяцыйнай тэхнікі, зенітных ракетных і радыётэхнічных войскаў. «Гэта будзе адбывацца як у межах двухбаковага ваенна-тэхнічнага супрацоўніцтва з Расіяй — закупка самалётаў Су-30, Як-130, ЗРК «Тор-М2», так і за кошт вытворчых магутнасцей айчыннага ваенна-прамысловага комплексу — закупка радыёлакацыйных станцый новага пакалення, апаратуры комплекснай абароны лятальных апаратаў ад высокадакладнай зброі, мадэрнізацыя ўзораў тэхнікі, што стаіць на ўзбраенні», — цытуе словы генерал-лейтэнанта Андрэя Раўкова БелаПАН.
Цяпер чытаюць
Адстаўны падпалкоўнік міліцыі адсудзіў кватэру ў сваёй дачкі. Гучная сямейная гісторыя з Брэста11
Каментары