Гурт Dzieciuki залічылі ў экстрэмісты і не дазволілі ўжо другі канцэрт у Мінску
Гродзенскі гурт Dzieciuki, імаверна, трапіў пад негалосную забарону. Апошні выступ калектыву ў Мінску адбыўся ў межах музычнай прэміі Еўрарадыё «Даём рады» 27 лютага. Пасля гэтага ўсе спробы арганізаваць канцэрт гурта былі безвыніковымі. Гродзенскія панкі збіраліся прэзентаваць новы альбом «Рэха» у сталічным клубе Re:Public 14 мая, аднак Мінгарвыканкам не выдаў дазвол на мерапрыемства.
Тое самае здарылася і з выступам гурта ў клубе Beer&Wine 15 мая, які меў адбыцца ў межах фэсту «Дзень дуды». Старшыня галоўнага ўпраўлення ідэалагічнай працы, культуры і па справах моладзі Мінгарвыканкама Павел Скалабан не каментуе, чаму «Дзецюкі» не могуць выступіць у Мінску, і кажа, што ўсё патлумачана ў лісце арганізатарам:
«Мы ўсё патлумачылі ў дакуменце. Дзе ўзяць дакумент? Не ведаю, мы даслалі яго заяўнікам».
Арганізатары канцэртаў таксама адмаўляюцца каментаваць сітуацыю. Па інфармацыі крыніцы Еўрарадыё з Мінгарвыканкама, у адказе ідэолагаў гаворыцца пра тое, што дзейнасць «Дзецюкоў» трапляе пад пункт 5 главы 2 «Палажэння аб арганізацыі і правядзенні культурна-відовішчных мерапрыемстваў», зацверджанага Указам прэзідэнта. Пад гэтым пунктам у дакуменце гаворыцца наступнае:
«Забараняюцца арганізацыя і правядзенне мерапрыемстваў:
- якія маюць на мэце ажыццяўленне прапаганды вайны ці экстрэмісцкай дзейнасці;
- якія прадстаўляюць пагрозу нацыянальнай бяспецы, грамадскаму парадку, маральнасці і здароўю насельніцтва, правам і свабодам грамадзян;
- з парушэннем патрабаванняў дадзенага Палажэння і іншых актаў заканадаўства, у тым ліку ў сферы аўтарскага права і сумежных правоў».
Сам гурт цяпер гастралюе па Польшчы і Украіне. Да сітуацыі з мінскімі канцэртамі музыкі ставяцца па-філасофску:
«То забараняюць, то дазваляюць. Будзем працягваць займацца асветніцтвам і творчасцю!»
Dzieciuki — гродзенскі фолк-панк-гурт, заснаваны ў 2012 годзе. У дыскаграфіі мае два поўнафарматныя альбомы «Гарадзенскі гармідар» і «Рэха».
-
Вядомы расійскі рэпер ніяк не можа выступіць у Мінску — то з законамі не шчасціць, то са здароўем
-
«Спачатку мы пяць дзён запар пілі піва, а потым пайшлі ў студыю». Беларусы стварылі панк-гурт у Амерыцы і запісалі альбом па-беларуску
-
«Маё сэрца разбіта». Эд Шыран выбачыўся пасля скандалу з адхіленнем рэпера Маклмора праз прапалесцінскія лозунгі
Каментары