«І ад тых насякомых-Кашчэяў пайшла адмысловая раса. Гэта яўрэі»
Піша Віталь Цыганкоў.
Я павінен быў адвезці тату з адным «народным знахарам» да іншага лекара. І вось я кірую машыну і слухаю ад знахара такое.
«Князі жылі па 240 гадоў. Яны проста ведалі сакрэт амаладжэння».
«Дождж можна выклікаць песняй. Калі шмат людзей спявае, яны выклікаюць вібрацыі, і ідзе дождж».
«У Сібіры, вы ведаеце, знайшлі залатую бабу, цалкам з золата. Але вы не ведаеце, што гэта была жывая жанчына, якая навучылася кантраляваць хімічныя працэсы і зрабіла сябе залатою».
«Вы ведаеце Катар? Гэта была такая дзяржава на тэрыторыі Францыі ў сярэднія вякі. Людзі, якія там жылі, валодалі таемнымі ведамі. Таму Папа сабраў усіх рыцараў Еўропы, мільён чалавек, яны напалі на Катар, і ўсіх яго жыхароў знішчылі, спалілі».
А зараз самае смачнае ))).
«А вось казкі пра Кашчэя, Здыхліка Несмяротнага. Чаму Кашчэй складаўся з адных касцей? Таму што гэта было казурка. Тады на зямлі ішла вайна паміж людзьмі і казуркамі. Але не толькі на Зямлі, а ва ўсім Сусвеце. І, дарэчы, ад тых насякомых-Кашчэяў пайшла адмысловая раса. Гэта яўрэі. У іх жа генетыка перадаецца па жаночай лініі».
Слухаю я ўсё гэта, стрымліваю рогат. І баюся толькі аднаго — як бы хутчэй даехаць да месца і не «уступіць у размову». А тут якраз лекар і пытаецца мяне: «Віталь, а якія ў вас сферы інтарэсаў, пра што з вамі можна пагаварыць?»
І я, хутка ацаніўшы сітуацыю, знайшоў, здаецца, адзіны магчымы адказ.
— Футбол! – сказаў я упэўнена.
— Толькі футбол? – расчаравана спытаў знахар.
— Толькі футбол! — яшчэ ўпэўненей пацвердзіў я.
Знахар уздыхнуў, і працягнуў расказваць пра тое, як ён умее паляпшаць ваду, за што хутка атрымае Дзяржаўную прэмію.
Каментары