Любая казка рана ці позна сканчваецца. Ісландская сага пра 23 герояў-футбалістаў скончылася 3 ліпеня на стадыёне Сэн-Дэні ў Парыжы.
Ісландыя рыхтавалася даць бой французам, грозным гаспадарам Еўра. Гэтак жа, як білася з Партугаліяй, Венгрыяй, Аўстрыяй і Англіяй. Ніводзін з тых матчаў Ісландыя не прайграла. Але ў чвэрцьфінале ўсё ад пачатку пайшло не так.
Ужо на 12-й хвіліне нападнік французаў Аліўе Жыру адгукнуўся на перадачу з цэнтра поля і выскачыў да варот Ісландыі. Стрэл паміж ног брамніку быў дасканалым па дакладнасці.
На 20-й хвіліне французы скарысталіся зброяй Ісландыі — стандартным становішчам. Пасля падачы з кутняга галавой забіў Поль Пагба.
А перад перапынкам ісландцы разваліліся канчаткова. За дзве хвіліны паспелі адзначыцца Дзімітры Пае і Антуан Грызман, якія вядуць між сабой завочнае спаборніцтва за званне найлепшага снайпера Еўра.
Нельга сказаць, што трэнеры Ісландыі змірыліся з разгромнай паразай. Дзве замены, зробленыя ў перапынку, натхнілі футбалістаў на гол прэстыжу — на 56-й хвіліне адзначыўся Кальбейн Сігтарсан.
Французы пачалі гуляць ў рэжыме ашчаджэння сілаў. Аднак нават гэтага хапіла, каб адгрузіць пяты гол. Усё ж Аліўе Жыру таксама хоча стаць найлепшым снайперам.
Апошняе слова засталося за ісландцамі. Біркір Б'ярнасон паставіў кропку ў матчы — 5:2.
Незалежна ад канчаткова выніку дакараць ісландцаў не варта — яны і так скочылі вышэй за галаву.
А французаў чакае паўфінальная бітва з Германіяй.
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне51
Каментары