Вучні гарадзенскай школы зьнялі фільм пра родны горад – і займелі праблемы зь мясцовымі ўладамі.
Блукаючы па відэапартале YouTube, нярэдка можна адшукаць цікавыя відэа, датычныя Беларусі. Гэтак, карыстальнік Haradzeniec зьмясьціў цэлы фільм, прысьвечаны барбарскай "рэканструкцыі" Гародні. Як выявілася, яго зьнялі хлопцы з гарадзенскай школы №28. Здымалі просьценькай відэакамэрай, мантавалі на ўласных кампутарах – а атрымаўся цікавы праект. Маладзёны нават арганізавалі прэзэнтацыю фільма ў роднай школе, але, як кажуць хлопцы, пасьля гэтага сваімі працоўнымі месцамі ледзь не паплаціліся загадчык гарадскога упраўлення адукацыі С. Блажэй, дырэктар школы М. Ахметаў і настаўнік школьнікаў, загадчык школьнага музея І. Рабкоў. Бацькоў школьнікаў (а некаторыя з іх займаюць даволі значныя пасады ў дзяржустановах) папярэдзілі па службовай лініі. У саміх школьнікаў таксама пачаліся праблемы – ім не даюць выступаць у школьных навуковых канфэрэнцыях у Гародні. Таму аўтары фільму прасілі не афішаваць іх імёнаў – акурат цяпер яны здаюць уступныя іспыты.
У тэхнічным пляне фільм небездакорны – але гэта акурат і прываблівае гледача. Кадры “рэстаўрацыі” Гародні, зьнятыя нібыта схаванай камэрай у спалучэньні з пазакадравым камэнтаром ды пагрозьлівай музыкай выглядаюць, як крымінальная хроніка. Фільм створаны зь любоўю ды на чыстым энтузіязьме – паболей бы такіх праектаў.
Пагллядзець фільм можна тут. Для таго, каб праглядаць яго не ў інтэрнэце, а спампаваць на кампутар, раім скарыстацца праграммай YouTube Downloader, якую можна задарма спампаваць тут.
Каментары