У кампаніі па выбарах у парламент працягваюць удзельнічаць 504 кандыдаты ў дэпутаты, паведаміла журналістам старшыня Цэнтрвыбаркама Лідзія Ярмошына 23 жніўня ў Мінску пасля пасяджэння ЦВК. «Быў 521 кандыдат, 21 зняўся. Пры гэтым аднаго аднавіла выбарчая камісія, трох — суд», — сказала Ярмошына.
Сёння на пасяджэнні Цэнтральнай камісіі была заслуханая інфармацыя прадстаўнікоў тэрытарыяльных выбарчых камісій, якія паведамілі пра вынікі разгляду скаргаў на адмовы ў рэгістрацыі кандыдатам у дэпутаты.
У прыватнасці акруговыя камісіі ў Брэсцкай вобласці прынялі рашэнне аб трох адмовах у рэгістрацыі прэтэндэнтаў на месцы ў парламенце. Два з іх безвынікова былі абскарджаныя ў абласной камісіі. Яшчэ два кандыдаты зняліся з выбараў. На гэты момант у Брэсцкай вобласці ў выбарах удзельнічаюць 72 кандыдаты ў дэпутаты.
У Віцебскай вобласці — 21 адмова ў рэгістрацыі кандыдатам у дэпутаты. Сем прэтэндэнтаў абскардзілі гэтае рашэнне. Пакуль усё абскарджанні былі безвыніковымі, яшчэ адна скарга сёння разглядаецца ў судзе. На гэты момант у рэгіёне 65 кандыдатаў у дэпутаты.
У Гомельскай вобласці — шэсць адмоў у рэгістрацыі кандыдатам у дэпутаты. Адзін кандыдат абскардзіў адмову, але безвынікова, яшчэ сем зняліся з выбараў. У выніку на гэты момант у выбарах удзельнічаюць 67 кандыдатаў.
У Гродзенскай вобласці акруговыя камісіі адмовілі ў рэгістрацыі 15 прэтэндэнтам. Дзевяць з іх абскардзілі гэтае рашэнне, тры скаргі разгледжаныя судом станоўча. На сёння ў рэгіёне зарэгістраваныя 57 кандыдатаў.
У Мінскай вобласці 19 прэтэндэнтам адмовілі ў рэгістрацыі, шэсць чалавек абскардзілі гэтае рашэнне, але безвынікова. Яшчэ пяць кандыдатаў зняліся з выбараў. На сённяшні дзень у выбарах працягвае ўдзельнічаць 61 чалавек.
У Магілёўскай вобласці — 15 адмоў у рэгістрацыі кандыдатам у дэпутаты. У пяці выпадках адмовы абскарджваліся, адна скарга задаволеная. Два кандыдаты зняліся з выбараў. Зараз у рэгіёне зарэгістраваныя 68 кандыдатаў у дэпутаты.
У Мінску акруговыя камісіі адмовілі ў рэгістрацыі кандыдатам у дэпутаты 13 прэтэндэнтам. Гэтыя рашэнні былі абскарджаныя ў чатырох выпадках, але безвынікова. Тры чалавекі зняліся з выбараў. Працягваюць удзельнічаць у выбарчай кампаніі 114 кандыдатаў.
Каментары