Украіна заклікае Беларусь ігнараваць мясцовыя выбары на Данбасе і выбары ў Дзярждуму ў Крыме
Украіна заклікае беларускі бок у выпадку правядзення мясцовых выбараў на Данбасе праігнараваць іх, а таксама выбары ў Дзярждуму Расіі на тэрыторыі Крыма, не накіроўваць назіральнікаў.
Пра гэта заявіла журналістам у Мінску 26 жніўня першы віцэ-спікер Вярхоўнай рады, прадстаўнік Украіны ў гуманітарнай падгрупе трохбаковай кантактнай групы па ўрэгуляванні сітуацыі на паўднёвым усходзе Украіны Ірына Герашчанка.»Хачу звярнуцца да нашых беларускіх калег з просьбай устрымацца ад любых спробаў, ад, магчыма, нейкіх настойлівых запрашэнняў Расійскай Федэрацыі ўзяць удзел як назіральнікаў у выбарах на акупаваных, анексаваных украінскіх тэрыторыях», — сказала Герашчанка.
«Мы ведаем, што ў верасні ў Расійскай Федэрацыі праходзяць выбары ў Дзяржаўную думу. І украінскі бок апелюе да ўсіх нашых міжнародных партнёраў, да ўсіх нашых суседзяў з просьбай устрымацца ад таго, каб накіроўваць сваіх назіральнікаў на анексаваныя тэрыторыі», — дапоўніла першы віцэ-спікер Вярхоўнай рады.
Украіна не прызнае выбары, якія адбываюцца «на адкушанай, выкрадзенай зямлі», падкрэсліла Герашчанка.
У Расіі 18 верасня пройдзе адзіны дзень галасавання па выбарах дэпутатаў Дзярждумы, кіраўнікоў суб'ектаў федэрацыі, а таксама дэпутатаў мясцовых органаў улады. Тэрміны правядзення мясцовых выбараў на Данбасе неаднаразова пераносіліся, умовы і мадальнасці іх правядзення пастаянна абмяркоўваюцца ў Мінску на пасяджэнні трохбаковай кантактнай групы па Украіне.
Цяпер чытаюць
Завадчанін Ігар, які вяртаўся дадому бухім, упершыню ў жыцці едзе за мяжу. А яшчэ ён халасты8
Каментары