Гродзенскім міжраённым аддзелам Следчага камітэта заведзена крымінальная справа па факце махлярства, здзейсненага ў буйным памеры (ч.3 арт.209 Крымінальнага кодэкса Рэспублікі Беларусь), паведамляе прэс-служба СК.
У здзяйсненні злачынства падазраецца 33-гадовы жыхар Гродна, які працуе на адным з гарадскіх прадпрыемстваў, які ўступіў у злачынную змову з некалькімі асобамі 1991—1996 гадоў нараджэння для атрымання страхавых кампенсацый пры дапамозе інсцэніроўкі дарожна-транспартных здарэнняў, адзначаецца ў паведамленні прэс-службы.
Злачынства выяўлена дзякуючы прафесійным дзеянням супрацоўнікаў батальёна дарожна-патрульнай службы ДАІ УУС Гродзенскага аблвыканкама. Пры высвятленні 29 верасня абставінаў здзяйснення дарожна-транспартнага здарэння на аўтадарозе «Бяляны — Гродна» ў Гродзенскім раёне з удзелам аўтамабіляў «Мэрсэдэс-Бенц S600L» і «Аўдзі А4», яны пабачылі неадпаведнасць пашкоджанняў аўтамабіляў абставінам іх атрымання, названых кіроўцамі.
Гэтыя падазрэнні ўзмацніліся пасля агляду месца здарэння, праведзенага следча-аператыўнай групай. Для пацвярджэння факту інсцэніроўкі ДТЗ, супрацоўнікамі міліцыі была распачатая праверка. Падчас яе ўстаноўлена, што адны і тыя ж асобы ў 2016 годзе неаднаразова станавіліся ўдзельнікамі ДТЗ, якія прывялі да выплату страхавых кампенсацый.
Версію супрацьпраўнага атрымання страховак пацвердзіла заключэнне экспертаў упраўлення Дзяржаўнага камітэта судовых экспертыз па Гродзенскай вобласці, зробленае па адным з такіх фактаў.
У рамках транспартна-трасалагічнага даследавання яны ўстанавілі, што на момант пашкоджання транспартныя сродкі знаходзіліся ў нерухомым стане, а характар пашкоджанняў не адпавядае акалічнасцям, названым удзельнікамі ДТЗ і следавой абстаноўцы на месцы здарэння.
У цяперашні час следчыя задакументавалі факт супрацьпраўнага завалодання ўдзельнікамі злачыннай змовы страхавых кампенсацый у суме звыш 12 тысяч рублёў у выніку праведзенай 3 лютага 2016 года інсцэніроўкі ДТЗ з удзелам аўтамабіляў «Мэрсэдэс-Бенц S420» і «Фольксваген-Джэта».
Мяркуецца, што практычна ўсе неабгрунтавана выплачаныя грашовыя сродкі дасталіся арганізатару злачынства, а саўдзельнікі атрымалі па 50 даляраў ЗША кожны.
У дачыненні да асноўнага фігуранта крымінальнай справы, які мае судзімасць за падробку ідэнтыфікацыйнага нумара транспартнага сродку, ужыта мера стрымання ў выглядзе змяшчэння пад варту.
Следчыя і супрацоўнікі міліцыі працягваюць разбірацца з абставінамі атрымання саўдзельнікамі іншых страхавых кампенсацый для ўстанаўлення магчымых новых эпізодаў злачыннай дзейнасці.
У гэтых мэтах праводзяцца допыты сведак, вывучаюцца дакументы, якія паслужылі падставай для выплаты страховак. Прызначана правядзенне яшчэ некалькіх транспартна-трасалагічных экспертыз. Прымаюцца неабходныя меры для забеспячэння кампенсацыі нанесенай страхавой кампаніі матэрыяльнага ўрону.
Расследаванне крымінальнай справы працягваецца.
Цяпер чытаюць
Зорка брэйкдансу з Віцебска атрымаў 11 гадоў турмы ў Кітаі. Што здарылася?4
Каментары