«Касперскі»: Інтэрнэт-карыстальнікі ў Беларусі ўсё яшчэ не навучыліся правільна ўжываць паролі

Кожны дзявяты інтэрнэт-карыстальнік у Беларусі сутыкаўся са спробай узлому анлайн-акаўнту. Асноўная прычына ў тым, што карыстальнікі ўсё яшчэ не навучыліся правільна ўжываць паролі, тым самым рызыкуючы сваімі ўліковымі запісамі і захаванасцю асабістых звестак. Да такой высновы прыйшлі аналітыкі «Лабараторыі Касперскага» паводле вынікаў праведзенага даследавання, паведаміла прэс-служба кампаніі.

Згодна з ацэнкамі «Лабараторыі Касперскага», далёка не ўсе беларускія карыстальнікі лічаць неабходным ахоўваць свае акаўнты з дапамогай надзейных і моцных пароляў. Так, толькі чвэрць (27%) ствараюць новую камбінацыю для кожнага асобнага акаўнту, большасць жа аддаюць перавагу апераваць абмежаваным наборам пароляў, выкарыстоўваючы адзін і той жа для доступу адразу да некалькіх уліковых запісаў. 13% апытаных жыхароў Беларусі наогул абыходзяцца адным паролем для ўсіх сваіх акаўнтаў.

Акрамя гэтага, беларускія карыстальнікі не асабліва імкнуцца зрабіць свае паролі устойлівымі да ўзлому. Напрыклад, вялікія і малыя літары камбінуюць толькі 23% удзельнікаў апытання, а нялітарныя і нялічбавыя сімвалы выкарыстоўваюць ўсяго 14%. Пры гэтым значная колькасць карыстальнікаў ўпэўненыя ў неабходнасці моцных пароляў для аховы сваіх ключавых акаўнтаў — сістэм анлайн-банкінгу (52%), сацыяльных сетак (43%) і асабістых кабінетаў у анлайн-крамах (31%).

Даследаванне «Лабараторыі Касперскага» таксама паказала, што часта людзі даволі нядбайна ставяцца да сваіх пароляў. Да прыкладу траціна апытаных дзяліліся імі з членамі сям`і, а 13% — з сябрамі. Акрамя таго, 26% беларускіх карыстальнікаў прывыклі запісваць коды доступу на паперы, каб не забыць іх. Усе гэтыя дзеянні могуць справакаваць выпадковую уцечку звестак.

Даследаванне праведзенае кампаніяй B2B International на запыт «Лабараторыі Касперскага» ў жніўні 2016 года. У апытанні ўзялі ўдзел 12.546 інтэрнэт-карыстальнікаў у 21 краіне. У Беларусі былі апытаныя 503 чалавекі.

«Лабараторыя Касперскага» — заснаваная ў 1997 годзе ў Расіі міжнародная кампанія, якая спецыялізуецца на распрацоўцы сістэм аховы ад камп`ютарных вірусаў, спаму, хакерскіх нападаў і іншых кіберпагроз. Адна з найбуйнейшых антывірусных карпарацый з сеткай рэгіянальных офісаў па ўсім свеце.

• 0
• 0
• 0
• 0
• 0