Расіянку, якая атрымала 7 гадоў зняволення за SMS, прызналі палітвязнем
Жыхарку Сочы Аксану Сэвастыдзі, якую праз SMS абвінавацілі ў дзяржаўнай здрадзе, праваабарончы цэнтар «Мэмарыял» прызнаў палітзьняволенай.
У 2008 годзе падчас расейска-грузінскай вайны Сэвастыдзі адправіла свайму грузінскаму сябру SMS-паведамленьне, дзе апавяла, што ўбачыла на вуліцах Сочы расейскую ваенную тэхніку. За гэта жанчыну абвінавацілі ў «дзяржаўнай здрадзе»: у сакавіку 2016 году расейскі суд асудзіў яе на 7 гадоў калёніі.
«Інфармацыя, якую яна перадала, была даступная неабмежаванаму колу людзей, і Сэвастыдзі не была папярэджана пра яе сакрэтнасьць. Мы лічым недапушчальным ускладаць на цывільных асоб адказнасьць за таямніцу ваенных апэрацый, а тым больш крыміналізаваць зносіны з замежнікамі пра ўбачанае на вуліцы. Калі падобная практыка стане нормай, гэта выкліча катастрафічныя наступствы для правоў чалавека ў Расеі», — адзначаецца ў заяве расейскіх праваабаронцаў.
Раней па аналягічнай справе была асуджана грамадзянка Грузіі Кацярына Харэбава, якая жыла ў Сочы. Яе таксама прызналі палітзьняволенай. Летам 2016 году яе вызвалілі ў рамках абмену з Грузіяй.
Усяго, паводле праваабарончага цэнтру «Мэмарыял», у турмах і калёніях Расеі знаходзіцца 103 палітвязьні.
Каментары