Зь Вілейска-Менскай воднай сыстэмы ў яе будзе скідацца ўдвая болей чыстай вады.
Санітарнае абвадненьне Сьвіслачы плянуецца павялічыць удвая, паведаміў старшыня Менскага гарадзкога камітэту прыродных рэсурсаў і аховы навакольнага асяродзьдзя Аляксандар Баравікоў.
Ён патлумачыў, што Сьвіслач ёсьць малаводнай ракой. Для таго, каб запасаў вады хапала для забесьпячэньня гаспадарча‑побытавых патрэбаў, а таксама для зьніжэньня ўзроўню агульнага забруджваньня вады прымяняецца такі мэтад, як рэгулярныя абвадняльныя пускі вады.
У часе абвадненьня па Вілейска‑Менскай воднай сыстэме ў Сьвіслач перапамоўваецца чыстая вада. Паводле санітарных правілаў, у адну сэкунду мусіць перапампоўвацца ня менш за 8 кубамэтраў. Цяпер перапампоўваньне ідзе ў аб’ёме 2,5 — 2,8 кубамэтраў у сэкунду. У выніку сыстэма недаатрымлівае каля 100 мільёнаў кубамэтраў вады. У зьвязку з гэтым спэцыялісты плянуюць павялічыць абвадненьне ракі ўдвая — да 5 кубамэтраў у сэкунду.
Штогод з гарадзкога бюджэту на гэтыя мэты вылучаецца каля 2 мільярдаў рублёў. З улікам пэрспэктывы павелічэньня абвадненьня спатрэбіцца ўжо 4 мільярды рублёў. Старшыня Менгарвыканкаму Міхаіл Паўлаў даручыў знайсьці дадатковыя сродкі на падтрыманьне воднага балянсу ў норме, сказаў суразмоўца.
Аднак часам адным перапампоўваньнем праблему паляпшэньня экалягічнай сытуацыі ня вырашыць, лічыць Аляксандар Баравікоў. Гэтак, штогод прадпрыемствам, якія знаходзяцца ў водаахоўных зонах і сваёй дзейнасьцю ўплываюць на якасьць вады, вылучаюцца фінансавыя сродкі на мерапрыемствы па прадухіленьні забруджваньня грунтовых водаў. Толькі сёлета для гаспадарак Вілейскага раёну з рэспубліканскага фонду аховы прыроды вылучана каля 700 мільёнаў рублёў, зь іх 250 мільёнаў — за кошт гораду.
Гэткая самая сытуацыя й па гаспадарках Менскага раёну, якія знаходзяцца ў зоне ўплыву Вялейска‑Менскай воднай сыстэмы і Маладачанскага раёну.
Апроч гэтага, будуць распрацаваныя дадатковыя ахоўныя мерапрыемствы па вывадзе з прыбярэжных, водаахоўных зонаў аб’ектаў, якія ўяўляюць небясьпеку забруджваньня падземных і паверхневых водаў. Гэта вывад і знос жывёлагадоўчых фэрмаў, рэканструкцыя вадасховішчаў, рэкультывацыя кар’ераў ды іншае.
Фота Андрэя Лянкевіча
Каментары