У Нью-Ёрку памёр амерыканскі актывіст Гілберт Бэйкер, які прыдумаў сімвал ЛГБТ-руху — вясёлкавы сцяг. Яму было 65 гадоў, піша ВВС.
У 1978 годзе Гілберт Бэйкер распрацаваў сімвал ЛГБТ-руху - сцяг, які першапачаткова складаўся з васьмі падоўжных палос розных колераў.
Ружовы колер сімвалізаваў сэксуальнасць, чырвоны — жыццё, аранжавы — вылячэнне, жоўты — сонечнае святло, зялёны — прыроду, бірузовы — мастацтва, індыга — гармонію, фіялетавы — чалавечы дух.
Пасля колькасць палос скарацілася да шасці, прыбралі ружовы і індыга, а бірузовы замянілі на сіні.
Бэйкер тлумачыў, што гэтым сімвалам ён хацеў данесці да людзей думку аб тым, што людзі могуць быць рознымі, але разам яны — адзінае цэлае.
У 2015 годзе вясёлкавы сцяг, створаны Бэйкерам, набыў нью-ёркскі музей сучаснага мастацтва. У інтэрв'ю музею Бэйкер распавёў, як да яго прыйшла ідэя стварыць сімвал ЛГБТ-руху.
«Нам трэба было нешта прыгожае, нешта наша, — сказаў Бэйкер. — Вясёлка выдатна падыходзіць, таму што яна адлюстроўвае нашу разнастайнасць з пункту гледжання расы, полу, узросту і гэтак далей».
Гілберт Бэйкер нарадзіўся ў Канзасе ў 1951 годзе. У пачатку 70-х гадоў, калі ў Амерыцы зараджаўся рух за правы геяў, ён жыў у Сан-Францыска.
Бэйкер удзельнічаў у дэманстрацыях ЛГБТ-руху і рабіў плакаты для мітынгаў, у тым ліку па просьбе Харві Мілка — першага палітыка, які адкрыта прызнаў сваю гомасэксуальнасць.
Каментары