Статкевіч пра «асабістую гвардыю» з «легіянераў»: Ні з кім з іх нават не знаёмы
У ананімным матэрыяле «Советской Белоруссіі» ад 11 красавіка, які быў прысвечаны «Беламу Легіёну», апроч іншага да «справы патрыётаў» прыцягваецца і Статкевіч.
Аўтары «СБ» робяць з «легіянераў» ужо прэтарыянцаў — называюць іх «асабістай гвардыяй Статкевіча».
Вось гэтая цытата:
«Б'е ў вочы сталая сувязь са Статкевічам. Не выклікае сумневаў абслуга яго палітычных афер, пра якія за 20 з лішкам гадоў чытачы напэўна начутыя. Спартовыя хлопцы нават знешне выглядалі як «ахоўныя атрады» Статкевіча, які ўсяляк заахвочваў і песціў «легіён», разлічваючы на яго як на «асабістую гвардыю», — піша «СБ».
Ці варта казаць, што нейкіх доказаў хаця б знаёмства Статкевіча з арыштаванымі не прыводзіцца? Як змоўчваецца таксама і пра статутны выгляд «ахоўных атрадаў Статкевіча», каб чытач мог самастойна параўнаць ступень падабенства «легіянераў» з вышэйназванымі.
«Наша Ніва» спытала ў палітыка, што ён думае пра такія фармулёўкі матэрыяла.
«Калі я каго і ведаю з гэтых людзей, якіх называюць сябрамі «Белага легіёна», то гэта Чыслава — бачыўся з ім апошні раз гадоў 10 таму. А астатнія… Ну ясна, што цяпер яны спрабуюць звязаць у адну справу 25 сакавіка, абарону Курапат, «Малады Фронт». Штосьці ў іх там не складваецца, таму імправізуюць вось, выдумляюць на хаду», — сказаў Статкевіч.
Палітык кажа, што апошнім часам увага да яго значна ўзрасла.
«Мабілізавалі ўсіх — і таемных і не, і дзяржаўных і апазіцыйных [агентаў]. Відаць, гэта такое прызнанне важнасці і небяспекі. Словам, ганаруся. Але, насамрэч, хлопцаў мы будзем выцягваць. За ўсімі гэтымі «інфармацыйнымі войнамі» стаяць лёсы канкрэтных людзей — сотняў людзей, калі ўлічыць бацькоў, жонак, дзяцей, братоў. За што яны пакутуюць? Тут нельга паддавацца — калі ўлады будуць бачыць, што грамадства баіцца, то будуць яшчэ болей страху наганяць», — рэзюмаваў палітык і анансаваў «захады ў адказ», пакуль без падрабязнасцяў.
Каментары