Кацярына Андрэева наведала паказ фільма, знятага па ейнай з мужам гісторыі кахання
У Варшаве адбыўся адмысловы паказ фільму Мары Тамковіч «Пад шэрым небам», падчас якога прайшла і сустрэча з журналісткай Кацярынай Андрэевай. Гісторыя былой палітзняволенай і ейнага мужа Ігара Ільяша і стала натхненнем для стварэння кінакарціны, нагадвае «Белсат».
Паказ прайшоў у кінатэатры Elektronik У зале былі сяброўкі Кацярыны — іншыя палітзняволеныя, разам з якімі яна знаходзілася за кратамі, журналістка Дар'я Чульцова, якая здымала той самы стрым з Плошчы Пераменаў. Прысутнічалі таксама Святлана Ціханоўская і іншыя прадстаўнікі ейнай каманды, акцёры і чальцы здымачнай групы фільма.
Андрэева распавяла, што паказаныя эмоцыі ў сцэне са стрымам на 80% супадаюць з тымі, што перажыла яна насамрэч. Але дадала, што іх першае з мужам спатканне ў зняволенні было больш пазітыўным, чым паказана ў фільме.
«Усё праходзіла вельмі жыццярадасна, і маё стаўленне да гэтага досведу было больш жыццярадасным, больш вясёлым і аптымістычным. Проста таму, што я такі чалавек. Мы на гэтых кароткіх спатканнях, нават не зважаючы на ахову, спявалі песні».
Са сцэны журналістка таксама падзялілася, якія моманты фільма ёй даліся эмацыйна няпроста. І распавяла, што не адразу пагадзілася прыйсці на паказ.
«Спачатку мне падавалася, што я не змагу і не здолею [прыйсці]. Што буду плакаць моцна, што я не змагу стрымаць свае эмоцыі — і навошта гэта на публіку паказваць. І саромелася, можа, сваёй магчымай рэакцыі, — шчыра адказала яна на пытанне з залы і ўзгадала некаторыя кадры.
— Было вельмі балюча глядзець на кватэру пасля вобшуку. І калі былі кадры затрымання Ігара, я проста адвярнулася, таму што не магла глядзець. Мне, праўда, балюча вельмі».
На мерапрыемстве шмат гаварылі пра журналіста Ігара Ільяша, за якога цяпер, пасля выхаду на волю, змагаецца Андрэева.
«Я буду сапраўды вольнай толькі тады, калі вызваляць Ігара. Для мяне вельмі важна скарыстацца такой магчымасцю менавіта цяпер, калі рыхтуецца чарговае вызваленне палітвязняў», — сказала Кацярына.
На сцэне нядаўна вызваленая журналістка трымала фотаздымак мужа, які пасля перадала лідарцы дэмсілаў Святлане Ціханоўскай з просьбай нагадваць пра вызваленне яго і іншых зняволеных журналістаў на міжнародных сустрэчах.
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2121
Каментары