Зміцер Панкавец: Укантакце — магутны інструмент супраць русіфікацыі моладзі
Навіна пра забарону ва Украіне сацыяльных сетак Укантакце ды Аднакласнікі выклікала жывую дыскусію. Адны рашуча падтрымлівалі ўкраінцаў. Маўляў, трэба цалкам пазбаўляцца расійскай інфармацыйнай прасторы. А Укантакце пакідае людзей жыць па культурных кодах Масквы. Плюс фактар таго, што персанальныя дадзеныя карыстальнікаў гэтай сацсеткі даступныя для расійскіх спецслужбаў.
Давайце будзем шчырымі, на сёння ўсе сацыяльныя сеткі ў той ці іншай форме збіраюць інфармацыю пра сваіх карыстальнікаў. Хай гэта будзе фэйсбук ці кітайскі Qzone. Цалкам бяспечнага нічога не існуе. Не хочаш, каб пра цябе нешта даведаліся — не рэгіструйся нідзе.
Укантакце на сёння — гэта самая папулярная сацыяльная сетка ў Беларусі. Для большасці — гэта проста канал камунікавання з сябрамі і роднымі, магчымасць знаёмства і атрымання інфармацыі. Калі размаўляў з некаторымі ўкраінскімі сябрамі пра забарону сацсетак, то яны абураныя найперш тым, што іх пазбаўляюць звыклых шляхоў камунікавання. Гэтыя людзі адданыя Украіне і не з’яўляюцца патэнцыйнымі сепаратыстамі.
Укантакце не ёсць толькі сродкам прапаганды. Гэта найперш наймагутнейшы інструмент контрпрапаганды. Чарнасоценскія суполкі кшталту «Мы патрыёты Белай Русі, ці «Змагар — выкарыстаная пракладка» набіраюць па некалькі тысяч падпісантаў. У той самы час іранічная група «Чай з малінавым варэннем» ці патрыятычная «Мая краіна Беларусь» маюць больш за 100 тысяч фаловераў кожная.
Не трэба забывацца, што Укантакце — гэта цэлы пласт інфармацыі па Беларусі, нашай гісторыі, мове, нашай славе. Тут можна знайсці суполкі на любы густ, а самае галоўнае, што па-беларуску.
Не са школы сёння пачынаецца патрыятызм. А з першага шэру карцінкі з Пагоняй, з праслуханай і змешчанай на сцяне песні Вольскага ці Міхалка, падпіскі на беларускамоўную суполку.
На сёння Укантакце — гэта адзін з самых магутных інструментаў супраць татальнай русіфікацыі нашай моладзі. Гэта трэба прызнаць, і з гэтым працаваць. У мяне ёсць ўражанне, што пра забароны Укантакце найбольш гучна крычаць тыя людзі, якія не разумеюць механізмаў дзеяння гэтай сацсеткі, не разумеюць, як яна можа прыносіць карысць, а не толькі шкоду.
Падпісацца на суполку «НН» Укантакце можна тут, а Аднакласнікі - тут.
-
Цыганкоў: Бабарыка значна бліжэйшы да пазіцыі офіса Святланы Ціханоўскай, чым да выказванняў «бабарыканцаў»
-
Бабарыка турэмшчыкам: «У мяне было, цяпер няма, але ёсць шанец, што будзе. А ў вас не было, няма і не будзе. І ў вашых дзяцей не будзе»
-
«Мне казалі: ты гаворыш як канадскі эмігрант». Сяргей Шупа расказаў пра Вільню 90-х, параўнанне літоўскай літаратуры з беларускай і адрозненні паміж народамі
Цяпер чытаюць
Што азначае расследаванне Міжнароднага крымінальнага суда для Лукашэнкі і беларусаў? Тлумачыць Кацярына Дзяйкала17
Каментары