Малдова абвясціла пяцярых расійскіх дыпламатаў персонамі нон грата, у сувязі з чым яны павінны пакінуць краіну. Пра гэта паведаміла знешнепалітычнае ведамства Малдовы, адмовіўшыся пры гэтым тлумачыць, чаму было прынятае такое рашэнне, піша DW.
Пасол Расіі ў Малдове Фарыт Мухаметшын заявіў, што дыппрадстаўніцтва атрымала адпаведную ноту і вывучае яе. Ён дадаў, што імёны дыпламатаў будуць названыя пазней.
Паведамляецца, што сярод дыпламатаў павінен быць памочнік ваеннага аташэ пасольства Расеі ў Малдове Аляксандр Грудзін. У сакавіку бягучага года спецслужбы Малдовы публічна абвінавацілі яго ў вярбоўцы і атрыманні сакрэтнай інфармацыі ад былога дэпутата парламента Малдовы Юрыя Балбачану, які быў арыштаваны 17 сакавіка. Балбачану абвінавачваюць па арт. 337 «Здрада Радзіме» і арт. 338 «Шпіянаж» КК Малдовы. Яму пагражае турэмнае зняволенне на тэрмін ад 12 да 20 гадоў.
Прэзідэнт Малдовы Ігар Дадон напісаў на сваёй старонцы ў фэйсбуку, што «глыбока абураны гэтым несяброўскім крокам з боку прадстаўнікоў малдаўскай дыпламатыі і асуджае яго самым катэгарычным чынам». Па яго словах, урад у Кішынёве запатрабаваў ад расійскага пасла, каб пяцёра дыпламатаў пакінулі краіну на працягу 72 гадзін.
Дадон назваў гэтыя дзеянні «прамымі правакацыямі, якія нясуць у сабе рызыку значнага пагаршэння малдаўска-расійскіх адносін». Ён таксама выказаў меркаванне, што гэта было зроблена «па замове з Захаду».
Каментары