Дзяржсакратар ЗША Рэкс Тылерсан заявіў, што ЗША не хочуць звязваць працэсы ўрэгулявання сітуацыі ва Украіне выключна рамкамі Мінскіх пагадненняў, паведамляе ТАСС.
Выступаючы на слуханнях у камітэце па замежных справах палаты прадстаўнікоў кангрэса ЗША, ён дапусціў магчымасць дасягнуць вырашэння канфлікту пры непасрэдным удзеле Масквы і Кіева, але на аснове дамоўленасцей, альтэрнатыўных тым, якія былі зафіксаваныя ў Мінску.
«Вельмі магчыма, што урад Украіны і ўрад Расіі могуць прыйсці да здавальняючага ўрэгулявання з дапамогай нейкай структуры, адрознай ад «Мінска», але якая дасягае мэтаў, закладзеных у «Мінску», якім мы адданыя, — сказаў шэф амерыканскай дыпламатыі. — Таму мая перасцярога заключаецца ў тым, што я б не хацеў, каб мы (ЗША) прыкоўвалі сябе да «Мінска», калі выявіцца, што бакі вырашаць урэгуляваць праблему з дапамогай іншага пагаднення».
Пры гэтым Тылерсан падкрэсліў, што амерыканская адміністрацыя не збіраецца змякчаць аднабаковыя санкцыі ў дачыненні да Расіі да дасягнення мэтаў, закладзеных у мінскіх дамоўленасцях.
«Наш намер у гэтым не заключаецца. І мы гэтага не зробім. Я зноў кажу пра мэты «Мінска», — сказаў кіраўнік Дзярждэпа, адказваючы на выказаную адным з заканадаўцаў асцярогу з нагоды таго, што прэзідэнт Дональд Трамп змякчыць антырасійскія санкцыі да пераадолення крызісу ва Украіне.
Цяпер чытаюць
«Яна была спартыўнай дзяўчынай». Што вядома пра загінулую пасажырку дэльтаплана, які ўпаў пад Мінскам1
Каментары