Супрацоўнікі ФБР зрабілі ператрус у доме Пола Манафорта, які ўзначальваў перадвыбарчы штаб прэзідэнта ЗША Дональда Трампа, паведаміла Бі-бі-сі са спасылкай на амерыканскія СМІ.
Федэральныя агенты, як паведамляецца, канфіскавалі дакументы і іншыя матэрыялы яшчэ 26 ліпеня. Кіраўнік аддзела расследаванняў ФБР Роберт Мюлер выйшаў з дому Манафорта у штаце Вірджынія з некалькімі дакументамі, паведамляе Washington Post.
За дзень да ператрусу Манафорт выступіў перад камісіяй кангрэса, якая расследуе імавернае ўмяшальніцтва Расіі ў выбары 2016 года.
Пакуль незразумела, якія дакументы былі канфіскаваныя з дому Манафорта.
Раней ён перадаў ў камітэты сената і кангрэса дакументы, якія тычацца іх расследаванняў у дачыненні да Расіі.
Як паведамляецца, гэта запісы, зробленыя падчас сустрэчы сына Дональда Трампа і расійскай адвакаткі Наталлі Весяльніцкай падчас іх сустрэчы ў Нью-Ёрку ў 2016 годзе.
Як вынікае з электронных лістоў Трампа-малодшага, ён пагадзіўся на сустрэчу і запрасіў Манафорта ў абмен на абяцанне прадставіць кампраметуючыя звесткі пра суперніцу Трампа ў прэзідэнцкай гонцы Хілары Клінтан.
Манафорту прыйшлося пакінуць каманду Трампа за некалькі месяцаў да галасавання. Падставай для сыходу Манафорта са штаба ў жніўні 2016 года сталі паведамленні амерыканскіх СМІ пра яго сувязь з прарасійскай Партыяй рэгіёнаў ва Украіне.
Каментары