З асобным уваходам і зонай барбекю. У «Мінск-Свеце» ёсць такая кватэра
У сучасных жылых раёнах Мінска часам можна сустрэць тое-сёе нечаканае. Напрыклад, у «Мінск-Свеце» сярод тысяч звычайных кватэр на паверхах ёсць і прапанова для выбраных — жыллё на першым паверсе з асобным уваходам, ды яшчэ і з зонай барбекю, піша Onliner.by.
Кватэра плошчай 41,9 кв. м знаходзіцца на першым паверсе 15‑павярхоўкі на вуліцы Савіцкага, 2. Гэта дом пад назвай «Сеул». Уваход у аднушку знаходзіцца недалёка ад пад'езда і ўяўляе сабой шкляную канструкцыю, якую лёгка зблытаць з якім-небудзь грамадскім аб'ектам тыпу крамы.
На планіроўцы відаць, што ў кватэры ёсць тэраса, веранда і агульная зона. Здаецца, увайсці ўнутр можна не толькі з вуліцы, але і з ліфтавага холу — як каму зручна.
Жылая прастора мае высокія столі, таму стала магчымым стварэнне так званай антрэсолі — другога паверха, на якім традыцыйна размяшчаецца спальня.
— Столі вышынёй 4 метры дазволілі стварыць другі ўзровень (спальня), што значна павялічвае карысную плошчу, — падкрэслівае рыэлтар. — Дзякуючы другому паверху рэальная плошча складае 56,4 метра.
Дызайн інтэр'ера хітрасплятаны. Вось як ён апісваецца ў аб'яве:
— Кожная дэталь прадумана для вашай зручнасці — убудаваныя шафы і антрэсолі для захоўвання рэчаў. Лесвіца з масіва дуба, ванна з гідромасажам, уся тэхніка італьянскага брэнда, вінная шафа. Сцены распісаны мастаком уручную, што надае памяшканню індывідуальнасць і стыль.
Ну а на тэрасе ўлетку можна смажыць шашлыкі:
— Свая агароджаная тэрыторыя, дзе можна абсталяваць зону для барбекю. Дазвол ад пажарнай службы атрыманы!
Кошт нестандартнай двухузроўневай кватэры — $139 000.
Каментары